బాలాజీ అర్చావతార విశేష దృశ్యార్చన 23

బాలాజీ అర్చావతార విశేష దృశ్యార్చన 23

( దృశ్యము 95 )

( ఆకాశ రాజు మహలు )

( పద్మావతీ దేవి పెళ్లి కూతురు అలంకరణలో ఒక వెదురు బుట్టలో కూర్చొని ఉంటుంది.)

( ఆమెకి ఎదురుగా ఒక పీఠంపై పార్వతీ దేవి మంగళ చండికా రూపంలో కూర్చొని ఉంటుంది. ఎర్రని చీర, ఎర్రని రవికె, ఎర్రని మందార మాల, ఎర్రని ఆసనము, ఎర్రని అక్షతలు, ఎర్రని కుంకుమ, పసుపు ఉండదు. అంతా ఎరుపు రంగులోతోనే ఉంటుంది )

( పద్మావతి ,కుంకుమతో పురోహితుడైన బృహస్పతి మంత్రం చదువుతూ ఉండగా, మంగళ చండికా దేవిని పూజిస్తుంది.

మంగళ చండికా స్త్రోత్రము---( మూల మంత్రం ) ఓం, హ్రీం,శ్రీం క్లీం సర్వ పూజ్యే దేవీ మగళ చండికే హూంహూం ఫట్ స్వాహా !

౧ దేవీం షోడశ వర్షీయాం శాశ్వత సుస్థిర యౌవనాం/బింబోష్టీం సుదతీం, శుద్ధాం శరత్ పద్మ నిభాననాం
శ్వేత చంపక వర్ణాభాం సునీలోత్పల లోచనాం / జగద్ధాత్రీంచ ధాత్రీంచ సర్వేభ్య స్సర్వ సంపదాం !
సంసార సాగరే ఘోరే జ్యోతి రూపాం సదా భజే !

౨ రక్ష రక్ష జగన్మాతే, దేవీ మంగళ చండికే / హారికే విపదాం రాశే, హర్ష మంగళ చండీకే !
హర్ష మంగళ దక్షెచ, శుభే మంగళ చండీకే / శుభే మంగళ దక్షేచ , శుబే మంగళ చండికే !
శుభే మంగళే మంగళార్హచ , సర్వ మంగళ మంగళే/ సతతాం మంగళదే దేవీ , సర్వెషాం మంగళాళయే !

౩ పూజ్య మంగళ వారస్యాచ, మంగళాభీష్ట దేవతే /పూజ్యే మంగళ భూపస్య , మను వంశస్య సతతాం !
మంగళ అధిష్టాత్రీ దేవీ, మంగళా నాంచ మంగళే / సంసారే మంగళాధారే, మోక్ష మంగళ దాయినీ !
సారేచ మంగళాధారే, పారేచ సర్వ కర్మణాం / ప్రతి మంగళ వారేచ పూజ్యే మంగళ సుఖ ప్రదే !

( పూజ ముగిసాక పద్మావతి, మంగళ చండి రూపంలో ఉన్న గౌరీ దేవికి నమస్కరిస్తుంది . గౌరీ దేవి ఆమెను ఆశీర్వదిస్తుంది )

(ఇదంతా చూస్తున్న సూత మహర్షి , బృహస్పతిని ఆడుగుతాడు )

సూతుడు ---దేవ గురూ ! వధువు చేతమంగళ చండికా పూజ చేయించడంలో ఆంతర్యమేమిటి ?

బృహస్పతి --- సూత మహర్షీ ! వ్రత కథలన్నిటినీ కరతలా మలకం చేసుకొన్న మీరీ ప్రశ్న ఆడగడం ఆశ్చర్యంగా ఊంది. ఈ పూజ దేవీ భాగవతం లోనిది ! మంగళ చండిక కన్య వివాహానికి కలిగే అన్ని అడ్డంకులను తొలగిస్తుంది. వధువుకున్న కుజ దోషం పరిహారం చేస్తుంది.

సూతుడు ---- పద్మావతీ దేవికి కుజ దోషమా ? గురువర్యా ! ఆమె అయోనిజ కదా ?

బృహస్పతి ---నిజమే పద్మావతీ దేవి అయోనిజ ! అంతకు ముందు జన్మలో వేదవతిగా కూడ ఆమె అయోనిజయే ! ఈ కన్య సంకల్ప మాత్ర జన్య !!--- కాని లక్ష్మీ దేవి సంకల్పించిన సమయం దోషానికి గురయింది. ఈ పూజతో ఆ దోష పరిహారం అయింది.

లక్ష్మి -- గురువర్యా ! వధువు జాతకమున కుజదోషము వైధవ్యమునకు కారణము కదా ?

బృహస్పతి--- అవును.

లక్ష్మి ---(నవ్వి ) ఆది మధ్యాంత రహితుడు, విరాట్ పురుషుడు , ఈ వివాహాన వరుడు అయిన, నా స్వామికి కూడ, మీరు ఈ దోషాన్ని ఆపాదిస్తున్నారా ?

బృహస్ఫతి --- ఆపాదించడం కాదు, శంకిస్తున్నాను.

లక్ష్మి --- ఎందుకని ?

బృహస్ఫతి --- స్వామి లీలా మానుష రూపమును ఇంకా త్యజించ లేదు గనుక !

లక్ష్మి --- దోషము, దోష నివారణము , యీ రెండూ భవష్యత్తులో జరగ నున్నాయా గురుదేవా ?,

బృహస్ప్తతి--- అవును శ్రీదేవీ !

లక్ష్మి --- వధువు నిక వివాహ మండపానికి తీసుకొని పోవచ్చా ?

బృహస్పతి--- తీసుకొని పోవచ్చు ! ఆమె మేనమామలు , బుట్టతో పాటు ఆమెను తీసుకొని వెళ్లి. వరుని కెదురుగా కట్టిన తెర ముందు ఆశీనురాలిని చేయాలి.

( అని వధువు దోశిలలో ఒక కొబ్బరి బొండం పెడతాడు )

( వరుని ముందు తెర వేస్తారు )

( వధువుని ఆమె మేనమామలు బుట్టతో పాటు మోసుకొని వచ్చి, వరుని కెదురుగా ,తెరముందు , కూర్చోపెడతారు )

( ఆకాశ రాజు , ధరణీ దేవి వధువు ప్రక్కన కూర్చొంటారు )

( ఆకాశరాజు, వరుని కాళ్లు కడిగి, వధువునీ, ఆమె చేతిలో కొబ్బరి బొండంన్ని, గుమ్మడికాయ, అరటి పళ్ల గెలలతో పాటు, వరుని చేతికిచ్చి కన్యాదానం చేస్తాడు )

( ఆ తరువాత జీలకర్ర బెల్లం వధూవరులు ఒకరి తలమీద మరొకరు పెడతారు )

( వివాహం సంపన్నమయినట్లే ! అందరూ అక్షింతలు వేసి వారిని ఆశీర్వదిస్తారు )

( తరువాత పద్మావతీ దేవి బుట్టలోంచి లేచి, నిలబడుతుంది. ’మధుపర్కాలు’ తీసుకొని లక్ష్మీ పార్వతులు ఆమెను లోనికి తీసుకు వెళ్తారు. మధుపర్కాలు కట్టించడానికి )

( శ్రీనివాసుడు , మధుపర్కాలు పట్టుకొని లేస్తాడు. అన్న గోవింద రాజులు , తమ్ముడు ఇంద్రుడు అతనిని తీసుకొని మరో లోగిలికి తీసుకొని వెళ్తారు, )

( ముందుగా వరుడు మధుపర్కాలు ధరించి వచ్చి, పెళ్లి పీట మీద కూర్చొంటాడు. )

( ఆ తరువాత వధువు వచ్చి, అతని ప్రక్కనే కూర్చొంటుంది. ఆమె చేతిలో జ్యోతులు వెలిగించిన పళ్లెం పట్టుకొని , లక్ష్మీ పార్వతులు తీసుకొని రాగా, ఇంకో జ్యోతుల పళ్లేన్ని ధరణీ దేవి, వకుళ మాలికలు పట్టుకు వస్తారు )

( ఆ తరువాత పురొహితులైన వశిష్టుడు, బృహస్పతుల మంత్ర పఠనాల మధ్య మాంగల్య ధారణ అవుతుంది )

( వచ్చిన పెళ్లివారందరూ ఆ జంటను ఆశీర్వదిస్తారు )

( పద్మావతీ కళ్యాణం సుసంపన్న మయింది )

******************