సత్య సాయి బాబా నన్ను కాపాడిన వైనం.

నేను ‘క్షీరగంగ’ బ్లాగర్’గా మీ అందరికీ తెలుసు. నా అన్నయ్య , వదినలు ‘భగవాన్ శ్రీ సత్యసాయి బాబా’ గారి పరమ భక్తులు. వాళ్ల ఇంట్లో ఎప్పుడూ లక్ష్మివారం భజనలు జరుగుతూ ఉంటాయి. ఆ భజనల్లో ఎన్నో చమత్కారాలు , ‘విభూతి పడడం, తేనె కారడం’ లాంటివి జరుగుతూ ఉండేవి. వాళ్ల ఇల్లు, ‘విజయ నగరంలోని అయ్యన్న పేటలో ఉండేది. ఆ ఇల్లుని బాబా నిలయంగా అందరూ పేర్కొనే వారు.

ఆ ఇంటికి వెళ్లిన నేను నాభార్య ఒకరోజు భజనలో పాల్గొన్నాం. ఆ తరువాత సహజంగానే మేము కూడ సత్యసాయి బాబా అనుగ్రహం కోసం అతని నామజపం మొదలు పెట్టాం.

నాకు శ్రీ సత్య సాయి అనుగ్రహం కలిగిన అనుభవం చాల విచిత్రమైనది. నేను చాల సన్నిహితులైన వారితోనే దానిని పంచుకొన్నాను. ఈ రోజు శ్రీ సత్యసాయి అవతార సమాప్తి గురించి విన్న తరువాత నా బ్లాగు మిత్రులతో ఆ అనుభవాన్ని పంచుకోవాలని అనిపించింది.

పది సంవత్సారాల క్రిందటి మాట ! నేను ‘ ఎస్.ఇ.సి.ఆర్. రైల్వే బిలాస్’పూర్’లో , సెక్షన్ ఇంజనీయరుగా పని చేస్తున్న రోజులవి. ‘ హౌరా,కుర్లా ఎక్స్’ప్రెస్ రాత్రి మూడు గంటలకి బిలాస్’పూరు ఫ్లాట్’ఫారం చేరుకొంది. అది చేరుకోవడానికి రెండు గంటల ముందే, నాకు కంట్రోల్ ద్వారా వర్తమానం అందింది. ఆ ట్రైను ఇంజనులో ఒక టెక్నికల్ స్నేగ్ ( సాంకేతిక లోపం ) ఏర్పడిందనీ, దానిని రిపేరు చేయమనీ ఆ ఆదేశం !

ఆ ఇంజను, స్పీడు పెంచాలని నాచ్ తీసుకొన్నప్పుడల్లా, ఇంజను ట్రిప్ ( ప్యుజు పోవడం లాంటిది ) అవుతోందనేది ఆ ఇంజను నడిపిన డ్రైవరు ఎదుర్కొంటున్న సమస్య !

నేను నాకు ఉన్న సాంకేతిక పరిఙ్ఞానంతో, చెయ్యకూడని సాహసం ఒకటి చేసాను. ట్రిప్ చేసే పరికరాన్నే బైపాస్ చేసేసాను. ఆ ఇంజనుని, ‘దుర్గు ’ వరకు వెళ్లేందుకు అనుమతించాను, దుర్గులో వేరే ఇంజనుని తగిలించమని చెప్పాను.

అయితే ఆ ఇంజను దుర్గు వెళ్లేలోగానే అంటే (ఇంకా ఆరు కిలోమీటర్లు ఉందనగా )పవర్’హౌస్ స్టెషను దాటే సరికి. ఇంజనులో పొగ రావడం మొదలయింది. నేను బైపాస్ చేసిన ఉపకరణమే కాలిపోవడం మొదలయింది. ఆ ఇంజను డ్రైవరు ఇంజను పవరుని ఆపేసి, ఆ ఆరు కిలో మీటర్ల దూరాన్ని అలాగే రోలింగులో లాగించేసి, దుర్గులో నిలిపాడు.

అక్కడ నా ఆదేశం ప్రకారం ముందుగానే తయారుగా ఉన్న ఇంజనుని ఆ ఇంజను మీదనే తగిలించి, రవాణా చేసేసారు.ఆ ట్రైను మా రైల్వే పరిథి దాటి సెంట్రల్ రైల్వే పరిథి లోకి వెళ్లిపోయింది. ఆ ఇంజను యొక్క హెడ్’క్వార్టర్ సెంట్రల్ రైల్వే కావడం దాని కారణం.

మర్నాటి ఉదయం ఎనిమిది గంటలకి డ్యూటీ ఆఫ్ అయిన నేను ఈ వివరాలన్నీ కంట్రోల్ ద్వారా విన్నాను. ఏ ఆపదా రాకుండా ఆ ఇంజను నిర్ణీత స్థానం వరకు పని చేసినా, కీలకమైన ఉపకరణాన్ని బైపాస్ చేసిన నాకు శిక్ష తప్పదని నాకు భయం వేసింది. విషయాన్ని ఎవరితోనూ చెప్పుకోలేని పరిస్థితి అది ! అన్నయ్యగారికి పోన్లో విషయం చెప్పాను. అతను నాకు ‘వెంటనే పుట్టపర్తి వెళ్లిపోమనీ, తక్కిన వన్నీ ‘ బాబాగారి’ మీదనే వదిలెయ్యమని చెప్పారు. నేను ఆఫీసుకి వెళ్లి పుట్టపర్తికి పాస్ తీసుకొని, నా భార్యతో సహా ఆ రాత్రికే నాగ్’పూరు మీదుగా ప్రయాణం కట్టాను .

పుట్టపర్తి చేరుకొని శ్రీ సత్యసాయి బాబా గారి దర్శనం ఛేసుకొన్నాం. శ్రీ సాయిని కొన్ని గజాల దూరం నుండి చూసాను. మనసులోనే నా విన్నపాన్ని విన్నవించుకొన్నాను.

తరువాత ఏమయిందో నాకు తెలియదు. నా ప్రయాణం ముగించుకొని, తిరిగి అదురుతున్న గుండెలతో, నా ఆఫీసుకి వెళ్లాను. పరిస్థితి మామూలుగానే ఉంది ! నా ఆశ్చర్యానికి అవధులు లేవు ! నా ఆతృత కొలదీ ఆ ఇంజను ఏమయిందోనని, బిలాస్’పూరు కంట్రోల్ నుండి, సెంట్రల్ రైల్వే నాగ్’పూరు కంట్రోలరుని సంప్రదించాను.

నాకు తెలిసిన దేమిటంటే, నేను బైపాస్ చేసిన రోజుకి ముందే ఆ ఇంజను అప్పటికే లక్ష కిలోమీటర్ల పైన ప్రయాణం చేసిందట ! అందువల్ల పీరియాడికల్ ఓవర్ ఆయిలింగ్’కి డ్యూ అయిపోయిందట ! దుర్గుని దాటి దానిని అనుమతించనందుకు, నాకు ధన్యవాదాలు తెలిపాడు !
ఆ విధంగా నేను చేసిన ఒక డర్టీ తప్పు పనిని, ఒప్పుగా మార్చి , శిక్షకి బదులు, ప్రశంసలు ఇప్పించడం శ్రీ భగవాన్ సత్య సాయి బాబా గారి మహిమ కాక మరేమిటి !

ఆ తరువాత నేను ఆపీసర్ని కూడా అయ్యాను !!