రక్కసి కందని రాచిలుక

‘సంపూర్ణ,’ అందాల చిలక లాంటి కన్నెపిల్ల.. పరిపూర్ణ సౌందర్యవతి. ఆమె విశాలమైన నీలి కళ్లు కలువల కొలనులాగ ఉంటాయి. ఆమె ముక్కు ఎక్కుపెట్టిన బాణంలాగ, నూటముఫ్ఫైయి అయిదు (90+45) డిగ్రీల అధిక కోణంలో నిటారుగా సంపెంగ రంగులో ఉండి, చిన్న కమ్మీని తగిలించుకొని, ఆ ముఖాని కంతటికీ తానే రాణినని విర్రవీగుతూ ఉంటుంది. ఆమె పెదవులు బొటన వ్రేలుతో మూయగలిగినంత చిన్నవి, వాటి రంగు పగడాలని తల దన్నేవే కాక గుండ్రని ముఖానికి, చూపులు తిప్పుకొనేటంతటి ఆకర్షణని తెచ్చి పెడుతూ ఉంటాయి.ముఖానికి రెండు వైపులా రెండు శ్రీకారాలు రాసినట్లుండే చెవులు, వాటి దిగువ వ్రేలాడే బుట్ట జుంకాలకే శోభనిస్తున్నట్లు ఉంటాయి. ఇక ఆమె పరువం, ఆమె యవ్వనం సరే, సరే ! పేరుకి తగినట్లే ఉంటాయి.

అలాంటి అమ్మాయిని స్వంతం చేసుకోవాలని ఎవరికుండదు ! ఆ ఉద్దేశంతోనే సంపూర్ణ తండ్రి దగ్గరకి వచ్చాడా యువకుడు !

సంపూర్ణ తండ్రి ఒక రాక్షసి అధీనంలో ఉన్నాడు. ఆ రక్కసి అతనిని అతనికి తెలియకుండానే అడుగు లేని అగాధం లోకి రోజురోజుకీ అతనిని నెట్టుకుంటూ పోతోంది ! దాంతో అతను తనలోని వివేకాన్నీ, విచక్షణనీ, ఉచితానుచిత జ్ఞానాన్నీ అన్నిటినీ కోల్పోయాడు. ఆ యువకుడి కేమి జవాబు చెప్పాడో ఏమో ! అతడు ఎర్బబడిన ముఖంతో తిరిగి వచ్చాడు.

ఆ తరువాత వారం రోజులకు, సంపూర్ణని కిడ్నాప్ చేసాఢు. ఆ యువకుడు. వివాహం చేసుకోమని అడిగాడు. సంపూర్ణ ఒప్పుకోలేదు. అతనికి ఆ కిడ్నాపులో సహాయం చేసిన మరోముగ్గురు మిత్రులు కూడ చేజిక్కిన అందాల చిలుకని అనుభవించకుండా, అతని సొంతం చేయడానికి ఒప్పుకోలేదు. దానితో అతను మరో సాహసం చేసాడు. వాళ్లందరితో దాదాపు యుద్ధం చేసి, ఆమెని విడిపించుకొని దూరంగా తీసుకొని పోయాడు. దారిలో అడిగాడు, ఆర్య సమాజ మందిరంలో వివాహం చేసుకొందామని ! సంపూర్ణకి ఇల్లు చేరాలంటేనే భయం వేసింది. తనకి రక్షణ కావాలంటే అతనితో సహచర్యమే మంచిదని నిర్ణయానికి వచ్చింది. ఫలితంగా వాళ్లిద్దరూ వివాహం చేసుకొని, ఒక మహా నగరంలో కాపరం పెట్టారు. సంపూర్ణ అతనిని వివాహమైతే చేసుకొంది గాని, మానసికంగా దగ్గర కాలేక పోయింది. అతను కూడా ఆమెని బలవంతం చేయలేదు. కాలమే సమస్యని పరిష్కరించి ఆమెని తన దగ్గరకు చేరుస్తుందనే నమ్మకంతో ఓపికతో నిరీక్షించ సాగాడు.


అయిదేళ్ల తరువాత ఒక రోజు-

ఆ మహానగరంలోని ఒక బిజీ మార్కెట్టు సెంటర్లో బస్సు కోసం ఎదురు చూస్తూ నిలబడి ఉంది సంపూర్ణ.

ఆమెకి ఎదురుగా రోడ్డుకి అటువైపు ఒక కారు ఆగింది. అందులోంచి ఒక అమ్మాయి దిగి, సంపూర్ణ వైపు అడుగులు వేస్తూ రోడ్డు దాటుతోంది. సంపూర్ణ ఆమె వంక చూసింది. “ఎక్కడో చూసినట్లుంది ! ఎవరు చెప్మా ? ఎవరో ఏమిటి, ప్రాంజలి ! అయిదేళ్లలో ఎంత మారి పోయింది ! ఎంత స్టయిల్గా అందంగా ఉంది ! అయిదేళ్ల క్రితం తను కూడా ఇంత అందంగా ఉండేది కాదేమో !!

ప్రాంజలి వచ్చి,సంపూర్ణ భుజం మీద చెయ్యి వేసింది.“అక్కా!ఎలా ఉన్నావు?”అని.సంపూర్ణ జవాబివ్వలేదు,ఆమెని చూస్తూ ఉండి పోయింది.

“ అక్కా!మెడలో మంగళ సూత్రాలు ఉన్నాయి,పెళ్లి చేసుకొన్నావా? ఎవరు,అతనేనా ?!----”

“ అతనేమిటే పాడు! -- వాడే నన్ను మాయ చేసి ఎత్తుకు పోయిన మోసగాడు!సమాజంలో తిరిగేందుకు రక్షణ కోసం వాడి చేతే ఈ మూడు ముళ్లు వేయించు కొన్నాను.ఇక నా సంగతి వదిలేయి!నీ సంగతి చెప్పు,కారులో ఆయన, మీ ఆయనేనా ?! నీకు పెళ్లి అయినట్లు లేదే ! ఎవరే అతను? ఎలా ఉన్నావే ?!----”

“ అక్కా! ఇన్ని ప్రశ్నలు ఒక్కసారే వేస్తున్నావు,చెప్తాను విను,రా!కారులో కూర్చొని మాటలాడు కొందాము.”అంటూ కారు వైపు తీసుకొని వెళ్లింది.తరువాత తన కథంతా చెప్పింది.

“ అక్కా!నువ్వు వాడు--- వాడు అంటున్నావే,అతనేనే నిన్ను కాపాడాఢు.”

“ ఆగవే కాపాడడం ఏమిటే! ---ఏమంటున్నావు నువ్వు?”

“అక్కా!ముందు నేను చెప్పేది విను,అతను నిన్నుపెళ్లి చేసుకొంటానని నాన్న దగ్గరకి వచ్చి అడిగాడు ఆ రోజు నేను,అమ్మ చాటునుంచి వాళ్ల మాటలు విన్నాం,నాన్న ఏమన్నాడో తెలుసా?నువ్వు‘బంగారు గ్రుడ్లు పెట్టే బాతువని’ పెళ్లి చేసి,నిన్ను వదులుకొనే మూర్ఖుడ్ని తాను కాననీ,అన్నాడు.”

“ నిజమా!” సంపూర్ణ నమ్మలేనట్లు చూసింది.

“ అవునే!నీ విషయంలో ఫెయిలయిన నాన్న,నన్ను వ్యభిచార గృహానికి తరలించాడే !ఇప్పుడు నువ్వు చూసిన ఆయన, నన్ను కట్టుకొన్న ఆయన కాడే!నా రసికుఢు!అతని లాంటి మరో నలుగురు రసికులని పది రోజుల పాటు సంతోష పెట్టి,తిరిగి నా గూటికి వస్తున్నాను.నేను ఈ కార్లో!దారిలో నువ్వు కనిపించావు,నన్ను తెచ్చినాయనతో చెప్పాను,నీతో మాట్లాడాలని,కారు ఆపి తాను బయటికి పోయి కుర్చొన్నాడు.”

“ ప్రాంజలీ !” సంపూర్ణ కళ్లలో నీళ్లు తిరిగాయి.

“అవునక్కా!ఆ రాకాసి చేతిలో పడిన నాన్న పూర్తిగా పతనమయ్యాడు.నన్ను వ్యభిచార గృహానికి అమ్మేసాక,అమ్మ గుండె పోటుతో చచ్చిపోయిందే!ఇంక అక్కడ ఏమీ లేదే !”

“ ప్రాంజలీ,అయితే నువ్వు------”

“ ఈ రకమైన జీవితానికి అలవాటు పడిపోయానే,నా గురించి దిగులు పడకు!నీ బ్రతుకు బాగు చేసుకోవే!ఉండు,ఈ ‘బ్రీఫ్ కేసు’తీసుకో!”అంటూ,ఒక బ్రీఫ్ కేసుని ఇచ్చింది ప్రాంజలి.

“ ఏమిటే ఇది!ఏముంది ఇందులో ?”

“ నా పది రోజుల సంపాదన ఉంది.పది లక్షల పైనే ఉంటుంది.తీసుకెళ్లి బావగారికి ఇయ్యి.అతనెలాగూ ఒక లారీ నడుపుతున్నారు కదా!ఆ లారీని అద్దె కిచ్చి,ఈ డబ్బుతో ఒక కారుని కొని నడుపుకోమను.సంపాదన పెంచుకొని--------”

“ ప్రాంజలీ!ఎందుకే ఇదంతా?”

“ కాదనకు అక్కా!నాకు సంసారం ఎలాగూ లేదు.నీ సంసారం నిలబెట్థుకొని హాయిగా బ్రతకవే ! బావ నిజంగాహీరోవే!నిన్ను నాన్న చేతుల్లోంచి కాపాడి, ధైర్యంగా ఎత్తుకు పోయి,పెళ్లి చేసుకొన్నహీరో!నీ మాటలు వింటూంటే అతనిని ఇంకా నీ మనసు స్వీకరించ లేదని అనిపిస్తోంది !అవునా ?”

“అవునే!చిలుకలాంటి నన్ను వేటాడి పంజరంలో పెట్టి బంధించాడు.నే నింకా ఆ పంజరమే అన్నీఅనుకోవడం లేదే!”

“అతను నిన్ను వేటాడింది నిజమే అయినా, నిన్నా ‘రాకాసి వలలోంచి’ కాపాడడానికే ఎత్తుకు,పోయాడే!అలా కాకుంటే నువ్వునా స్థానంలో ఉండేదానివే !”

సంపూర్ణకి ప్రాంజలి మాటలు అర్థమయ్యాయి.నాన్నని పట్టిన ఆ రాకాసిని తలచుకొంటేనే,ఆమెకి జుగుప్స కలిగింది..‘ రాచిలుక లాంటి తనను, త్రాగుడనే రాకాసి కోరల్లోంచి రక్షించిన వాడు, ఆ మోసగాడు---- ప్రాంజలి చెప్పిన నిజం విన్నాక,నిజంగానే హీరోలాగ కనిపించాడు. వెంటనే వెళ్లి,అతని కౌగిలిలో కరిగి పోవాలని అనిపించింది.

“వస్తానే ప్రాంజలీ!”అంటూ బ్రీఫ్ కేసు తీసుకొని బయటికి నడిచింది సంపూర్ణ,సంపూర్ణమైన అవగాహనతో.
************************