బాలాజీ అర్చావతార విశేష దృశ్యార్చన 19

బాలాజీ అర్చావతార విశేష దృశ్యార్చన 19

( దృశ్యము 87 )

( ధరణీ దేవి అభ్యంతర మందిరం )

( ధరణీ దేవి, ఆకాశ రాజు కూర్చొని ఉంటారు )

ధరణీ దేవి -- ప్రభూ ! వివరంగా చెప్తాను వినండి. గత ఉగాది నాడు , రాజ సభలో దైవఙ్ఞులు, మన పద్మావతికి, పురుషోత్తముడైన వరుడు లభిస్తాడనీ, దేవతలే ఆమె పెళ్లికి పెద్దలవుతారనీ, చెప్పారు కదా !

ఆకాశ రాజు --- అవును, దైవఙ్ఞులు, అలాగే చెప్పారు !

ధరణీ దేవి--- ఆ పైన మన ఉద్యాన వనమున, ఒక వృద్ధ బ్రాహ్మణుడు, పద్మావతి చేయి చూసి, అదే విధముగా జోస్యముగా చెప్పినాడు.

ఆకాశ రాజు--- నిజమే ! ఈ విషయము మీరు ఇదివరకే తెలియజేసినారు !

ధరణీ దేవి-- అవును ప్రభూ ! ఆ తరువాత అదే ఉద్యాన వనమున, మన పద్మావతి ఒక సుందర పురుషుని సంధించి, అతని మీద మనసు పడి, బయటికి చెప్పలేక, లోన దాచుకోలేక జ్వరపడింది.. ఇదంతా ఒక ఎరుకల సాని తన సోదెలో చెప్పింది.

ఆకాశ రాజు -- దేవీ ! పద్మావతి సఖులు---

ధరణీ దేవి---- ఆ విషయమును ధృవ పర్చినారు ప్రభూ !

ఆకాశ రాజు --- మీరు మన అమ్మాయిని --

ధరణీ దేవి—అడిగి తెలుసుకొన్నాను మహారాజా ! ఆమె అతనిని ప్రేమించిన మాట నిజము ! -- వెంటనే ఎరుకల సాని చెప్పిన విధంగా , అతనికే పిల్లనిచ్చి పెళ్లి చేస్తానని, ముడుపు కట్టగానే, పద్మావతి జ్వరం మటు మాయ మయింది !

ఆకాశ రాజు-- దేవీ ! మీరలా తొందర పడడం సబబు కాదేమో ఆనిపిస్తోంది.

ధరణీ దేవి--- పరిస్థితిని బట్టి అలా చేయడం తప్పని సరి అయింది ! ముందుగా అమ్మాయి ఆరోగ్యం బాగయితే చాలని, ఆ యువకుని నుండి, వివాహ ప్రస్తావన ,వస్తే చూసుకోవచ్చునని, అలా చేసాను.

ఆకాశ రాజు --- ఇంతకీ ఆ యువకుడెవరు దేవీ ?

ధరణీ దేవి-- అతని నివాసం వేంకటాచలమట ! తల్లి తండ్రుల ఫేర్లు దేవకీ వసుదేవులట !

ఆకాశ రాజు-- అతని తల్లి తండ్రులు గతించినారా దేవీ ?

ధరణీ దేవి -- మీరు ఊహించినది నిజమే ప్రభూ ! తల్లి తండ్రులు గతించినారు. పాలిత మాత ఉన్నది.ఆమె పేరు వకుళా దేవి ! అతని నివాసము వేంకటాచలమే ! పెర్లు చాల ఉన్నాయి.- వేంకట రమణుడనీ, శ్రీనివాసుడనీ విన్నాము !

ఆకాశ రాజు-- ఈ వివరము లన్నియు ఎట్లు తెలిసినవి ?

ధరణీ దేవి --- అతని పాలిత మాత వకుళామాత వివాహ ప్రస్తావన తెచ్చినది. ఆమెను మన విశ్రాంతి గృహమున యుంచి మీ కడకు కబురంపితిని.

( ప్రవేశం పరిచారిక )

పరిచారిక -- మహారాణీ వారికి నమస్కారము ! మహారాజుల వారికి జయము ! శుక మహర్షులవారు వచ్చి, ప్రవేశమునకు అనుమతి కోరుతున్నారు.

( రాజ దంపతులు ఒకరి ముఖాలు, మరొకరు చూసుకొంటారు )
ధరణీ దేవి-- ప్రభూ ! వేంకట రమణుని పాలిత మాత, తన పుత్రుని కీర్తి ప్రతిష్టలను, శుక మహర్షుల వారిని, అడిగి తెలుసుకోమన్నది ! ఈ సమయమున వారి రాక, దైవ ప్రేరితము వలె నున్నది.

ఆకాశ రాజు --- దేవీ ! మహర్షుల ఆశయములు సద్యః ఫలితముల నిచ్చునవి ! మనము సంతతి కొరకు తపించు తరుణమున ఈ శుక మహర్షి తనంత తానుగా విచ్చేసి, మన సమస్యకు పరిష్కారము సూచించిన వారైరి ! ఇప్పుడు ఆమె వివాహ ప్రస్తావన సమయమున, అతని రాక, మన ప్రస్తుత సమస్యకు పరిష్కారము కాగలదేమో ! ( పరిచారికతో ) శుక మహర్షుల వారిని సగౌరవమగా ప్రవేశ పెట్టుము.నీ వెంట మరికొందరు పరిచారికలను---

ధరణీ దేవి --- ప్రభూ ! పరిచారికలెందుకు నేనే ఎదురేగి వెళ్లి, అతనికి స్వాగతము పలికెదెను.

ఆకాశ రాజు--- లెస్స పలికితివి దేవీ ! నీ వెంట నేనును వచ్చెదను.

*****************

( దృశ్యము 88)

( ధరణీ దేవి అభ్యంతర మందిరం )

( పరిచారికలు పూల పళ్లేలటో , పూలని జల్లుతూ రాగా, ఆకాశరాజు, ధరణీ దేవి, శుక మహర్షిని వెంట పెట్టుకొని లోపలికి ప్రవేశిస్తారు )

( శుకమహర్షిని ఆశీనుని చేసి, రాజు రాణి కూర్చొంటారు )

శుక --- ఆకాశ భూపతీ ! అందరూ కుశలమే కదా ?

ఆకాశ రాజు--- మీ రాక వల్ల సర్వ శుభములు కలిగి, రాజ్యమంతయు కుశలమైనది. మహర్షీ ! తపో భూమి వదిలి, మీరిట్లు కదలి వచ్చుటకు కారణమేమి ? కబురంపిచినచో మేము వచ్చు వారము కదా ?

ధరణీ దేవి--- మహర్షీ ! ఎంత కాలమునకు యీ పుత్రికపై మీకు దయ కలిగినది !

శుక --- పుత్రీ, ధరణీ దేవీ ! నీ ఆధరాభిమానములకు చాల సంతోషమైనది. ఆశ్రమము విడిచి లోకుల ఆవాసములకు వచ్చుట నాకు అలవాటు లేని పని , అంతియె గాని మీ రాజ దంపతులపై అభిమానము లేక కాదు !

ధరణీ దేవి --- అవును ఊరక రారు కదా మహాత్ములు—

శుక ---- నిజమేనమ్మా ! శ్రీనివాసుని పాలిత మాత వకుళా మాత వేంకటాచలమును వదలి, మీ రాజ మందిరమునకు వచ్చిన వార్త తెలిసి, ఆమె దర్శనము కొరకై , నే నిటుల వచ్చితిని. ఆమెను కొండపై కలుసుకొనుట కుదురట లేదు !

( రాజ దంపతులు ఒకరి ముఖాలు ఒకరు చూసుకొంటారు )

ఆకాశ రాజు--- మహర్షీ ! మీరు--- మీ వంటీ మహనీయులు , ఒక సామాన్య వృద్ధ మాత దర్శనమునకై, పని గట్టుకొని వచ్చినారా !? ఆశ్చర్యముగ నున్నదే !

శుక --- ఆకాశ భూపతీ ! ఆమె సామాన్యురాలు కాదు, ద్వాపరమున లోక కళ్యాణమునకై పుట్టిన శ్రీ కృష్ణుని బాల్య లీలలు స్వయముగా వీక్షించిన యశోదా మాత !

ఆకాశ రాజు--- మహర్షీ ! శ్రీ కృష్ణుని తల్లి తండ్రులు దేవకీ వసుదేవులు కదా !

శుక -- నిజము మహారాజా ! కారణ వశమున అతడు, దేవకీ గర్భమున జన్మించినను తన శైశవ ప్రాయ మంతయు యశోదా మాత కడనే గడపెను..

ఆకాశ రాజు --- మహర్షీ ! మీరు ఇప్పుడు చెప్పిన ఈ వకుళా మాత----

శుక ---- ( నవ్వి ) యశొదా మాతయే, జన్మాంతరమందు వకుళామాత అయినది.!-- తన పాలిత పుత్రుని, శైశవ లీలలే తప్ప, కళ్యాణ వేడుకలు చూడని, ఆమె కోరికను,--- ఈ జన్మలో తీర్చుకొనుటకై, ఆమె -- మీ కడకు వివాహ ప్రస్తావన తీసుకొని వచ్చినది.

ధరణీ దేవి-- మహర్షీ ! అటులయిన -- ఆ వేంకట రమణుడు !!—

శుక --- శ్రీ కృష్ణుడేనమ్మా ! అవతార మూర్తులకు యుగబేధములు జన్మజన్మాంతరములు, లెక్కకు రావు పుత్రీ !

ఆకాశ రాజు-- మహర్షీ ! అటులయిన శ్రీనివాసుడు శ్రీ మహావిష్ణువే నన్నమాట !!

శుక -- ఆకాశ భూపతీ ! సందేహించకము ! ( పద్యము )

ఉ--- అతని వంటి సుందరుడహర్పతి తేజుడు, విశ్వవాఙ్ఞ్మనో
తీతుడు, ధర్మవర్తి, రణధీరుడు, సద్గుణమూర్తి, లోక వి
ఖ్యాతుడు, దేవపూజ్యుడు, మహామహిన్వితుడైన యట్టి, జా
మాత లభించుటెన్న, నతిమానుష పుణ్య ఫలంబు సూ నృపా !

ఉ-- కావున నొండు మాటనక, గారవమారగ వానికీవు, ప
ద్మావతి నిచ్చి, పెండిలి యధావిధి సేయుము, సప్త పూరుషం
బీవల, నావలన్ నృప ! త్వదీడ్య కులంబు తరించు, లోక సం
భావిత పుణ్యముల్, త్రిదివ వాసము నీకు లభించు భూవరా !

( ప్రవేశం పరిచారిక, దారి చూపుతూ ఉండగా, వకుళా మాత )

వకుళ --- మహర్షీ ! నా కొడుకు కీర్తి ప్రతిష్టలేనా చెప్తున్నారు !!

శుక --- ( లేచి నిలబడి నమస్కరించి) ప్రణామము మాతా ! మీ దర్శనమునకై వచ్చి, ప్రసంగ వశమున శ్రీనివాసుని గురించిన సందేహములను ----

వకుళ --- పటాపంచలు చేసారన్నమాట !

( వకుళామాత మాటలకు అందరూ నవ్వుకొంటారు )

******************

( దృశ్యము 89)

( వేంటాచలం పుట్ట )

( శ్రీనివాసుడు కూర్చొని ఉంటాడు )

( ప్రవేశం శుక మహర్షి, వచ్చి శ్రీనివాసునికి నమస్కరిస్తాడు )

శుక --- శ్రీనివాసా ! అవతార కారకుడ వైన నీవు, ఒక సరస్సు లాంటీ వాడివి. నీ అవతారాలన్నీ ఆ సరస్సునుండి బయలు దేరిన కాలువల వంటీవి. ( శ్లోకం )

శ్లోకం--- అవతారహ్య సంఖ్యాయాః / హరే స్సర్వనిధైః ద్విజాః
యదా విదానః కుల్యాః / సరసున్యుః సహస్రశః

ఈ కలి యుగమున ఆశ్రితులను కాపాడే అర్చారూపం దాల్చనున్న నీకు నా సహస్ర కోటీ వందనాలు.

శ్లోకం---- వేంకటేశాయ విద్మహే, త్రిపతి నాధాయ ధీమహి, తన్నో శ్రీనివాస ప్రచోదయాత్ !

( అంటూ శుకుడు శ్రీనివాసునికి సాష్టాంగ ప్రణామం చేస్తాడు )

(శ్రీనివాసుడు శుకుని లేవదీస్తాడు )

శ్రీనివాస ---- శుక మహర్షీ ! మీ రొనర్చిన ఈ వేంకటేశ గాయత్రీ మంత్రం మిక్కిలి మహిమాన్వితమగు గాక ! అంతియే కాదు, మీరు నాకిచ్చిన ’త్రిపతి’ నామధేయముతోనే యీ ప్రాంతము ప్రసిద్ధమగుగాక !

శుక --- దేవదేవా ! మీరు నా మీద చూపించిన గౌరవమునకు ధన్యడనయితిని.నేను వచ్చిన పని మీకు తెలియనిది కాదు. అయినను వచ్చిన కారణము విన్నవించుకొంటున్నాను.వినుడు-- చోళ రాజగు ఆకాశ భూపతి , అతని ధర్మపత్నియగు ధరణీ దేవి దంపతుల గారాబు పట్టి, కుమారి పద్మావతిని, మీకిచ్చి వివాహము చేయుటకు సమ్మతించి ,బృహస్పతి చేత వ్రాయించిన శుభలేఖను, మీకు ఇచ్చుటకై వచ్చినాడను, స్వీకరింపుడు !

( అని శుభలేఖను శ్రీనివాసునికి ఇస్తాడు. శ్రీనివాసుడు శుభలేఖ చూస్తూ ఉంటాడు )

( ప్రవేశం వకుళామాత , చేతులో ఆకు దొన్నెలలో తేనె , కంద మూలాలు తెస్తుంది )

వకుళ --- మహర్షీ ! ముహూర్తం చాల బాగుంది ! నా కొడుకు బదులు నేనే చెప్తున్నాను. వానికి అంగీకారమే ! ఇదుగో ఈ జుంటి తేనె కంద మూలములు సేవించి, వానిని ఆశీర్వదించి వెళ్లండి.

( శుకుడు ఆమె తెచ్చినవి ఆప్యాయంగా తింటాడు )

శ్రీనివాస--- శుక మహర్షీ ! అమ్మ అంగీకరించింది కనుక నాకు అంగీకారమే !

వకుళ --- ( నవ్వి ) కుమారా ! నా మాట మన్నించినందుకు చాల సంతోషం ! ముందుగా ఈ వార్తను వరాహ స్వామికి తెలియజేసి, వారి ఆశీస్సులు పొందుము. ఆ పైన ఆకాశ భూపతి పేర , ప్రతి శుభలేఖను వ్రాసి , శుక మహర్షి కిచ్చి పంపుము.

శ్రీనివాస -- తల్లీ ! అటులనే చేసెదను.ఆదిశేష, గరుత్మంతులకు వివాహ శుభలేఖలను ఇచ్చి,సత్యలోక, తపోలోక, కైలాస, నాగ లోకముల లోని, దేవ గణము లందరినీ, ఆహ్వానించెదను.

వకుళ--- ఆహా ! ఏమి నా భాగ్యము ! నీ పెళ్లికి తరలి వచ్చే దేవతా సమూహములను, కనులార కాంచు తరుణము వచ్చినది కదా ! శ్రీనివాసా ! నా జన్మ ధన్యత నందినది కదయ్యా !

*******************