బాలాజీ అర్చావతార విశేష దృశ్యార్చన 30

బాలాజీ అర్చావతార విశేష దృశ్యార్చన 30

( దృశ్యము 106 )

( తొండమానుని రాజ్య సరిహద్దులలో ఒక చిట్టడవి )

( అడవి లోని దారిగుండా ఒక రెండెడ్ల బండి, వెళ్తోంది. బండీ నాయుడు బండి నడుపుతున్నాడు )

( బండిలో కూర్ముడనే బ్రాహ్మణుడు , అతని భార్య మహాలక్ష్మి ,అయిదేళ్ల కొడుకు రాఘవుడు ఉంటారు .మహాలక్ష్మి ఆరునెలల గర్భవతి )

( బండి క్రింద ఒక ఉట్టి వ్రేలాడుతోంది. ఆ ఉట్టిలో ఒక కుండ , ఆ కుండలో అస్థికలు, కుండమీద మూత ఒక గావంచాతో బిగించి కట్టబడి ఉంది )

( బండి నెమ్మదిగా వెళ్తోంది )

మహాలక్ష్మి--- కరివేపాకు, వంటకాలు , రుచులు , వీటాన్నిటికీ మీ వ్యాఖ్యానాలు బాగున్నా, ఇంకా ఎక్కడి పశ్న అక్కడే ఉండిపోయింది !

కూర్మ --- ఏమిటి మహాలక్ష్మీ ! నీకు అర్థం కానిది ?

మహాలక్ష్మి--- మీ కొండ మీద దేవుడికి కావలసిన కరివేపాకు, వరాలు కోరుకొనే భక్తులు తెచ్చి ఇవ్వాలి ! కాని , పద్మావతి దేవి ఎందుకు తెచ్చి ఇవ్వాలి ? ఆవిడ కోరిన వరం, అతనిని పెళ్లాడడమే ! అది తీరిపోయాక , ఇంక కరివేపాకు తీసి పారెయ్యాలి కదా ?

కూర్మ --- మహాలక్ష్మి ! నువ్వీ రోజు మంచి ప్రశ్నలే వేస్తున్నావు ! దానికీ , అంతరార్థం ఉంది ! మా కొండంత దేవుడు , కొన్ని వందల సంవత్సరాలు , పుట్టలో కూర్చొని తపస్సు చేసాడు , ఎందుకొని ? వరాలు ఇవ్వడం చేతకాక కాదు ! -- అలాగే శ్రీ మహాలక్ష్మి అంటావా , ఐశ్వర్యాన్నివ్వడం ఆవిడ అరచేతిలో పని ! అయినా స్వామివారి లాగే, అన్ని వందల సంవత్సరాలూ తపస్సు చేసింది ! ఇదంతా దేని కోసం అంటావ్ ?

మహాలక్ష్మి--- చెప్పేదేదో పూర్తిగా చెప్పండి అందరికీ అర్థమయ్యే లాగ !

కూర్మ --- ఆ విషయానికే వస్తున్నాను. ఈ కలియుగంలో భక్తులకి తపస్సు చేసే తీరిక , ఓపిక లేవు ! అలాంటి వారి కోసం, వెలిసిన దేవుడు శ్రీ వేంకటేశ్వరుడు ! తన భక్తుల వంతు తపస్సంతా తానే చేసాడు ! ఇక ఏ దేవునికీ మొక్క నవసరం లేకుండా , అంతా తానుగానే మూర్తీభవించాడు !

మహాలక్ష్మి--- శ్రీమహాలక్ష్మి కూడా అందుకే తపస్సు చేసిదంటారా ?

కూర్మ -- అవును ! ఇప్పుడు వారిద్దరూ కొండ మీద కొలువై ఉన్నారు . కాని పద్మావతి అలా కాదు కదా ? ఆమె దగ్గరకు వచ్చే భక్తులకు , ఆమె వరాలెలా ఇవ్వ గలుగుతుంది ! తన తపస్సు ధారపోసి ఇవ్వాలంటే , సాధన అవసరం కదా ! ఆ విషయం అర్థం చేసుకుంది కాబట్టే, శుకాశ్రమంలోని, పద్మ సరోవరంలో పద్మాల మధ్య దాగొని, తపస్సు మొదలు పెట్టింది . సాధన పూర్తి చేసేందుకు, ఎంత కరివేపాకు తోట వెయ్యాలో ఆలోచించు !

మహాలక్ష్మి---సాధన పూర్తి అయ్యాక తిరిగి కొండ మీదకి చేరుతుందంటారా ?

కూర్మ --- ఆలు మగల మధ్య మనసులు కలిసాక ఎవరు ఎవరి దగ్గర ఉండాలనేది సమస్య కాదు మహాలక్ష్మీ!

మహాలక్ష్మి --- ఇంకొక ప్రశ్న ఉండిపోయింది.

కూర్మ --- ఏమిటది ?

మహాలక్ష్మి -- కరివేపాకు తీపి వంటలకి వాడరు కదా , ఆ తీపి వంటకం అర్థమేమిటి ?

కూర్మ --- తీపి వంటకం అంటే మోక్షం ! మోక్షమంటేనే కోరిక లేక పోవడం కదా ! కోరికలు లేనివారికి తపస్సు. సాధన . రుచి ఏదీ అవసరం ఉండదు.

నాయుడు -- చాలా బాగా చెప్పారయ్యా ! మా తొండమాను చక్రవర్తికి కూడా యీ విషయం తెలియదంటే నమ్మండయ్యా ! ( అని నాలుక కరచుకొంటాడు )

కూర్మ --- ఏమన్నావు నాయుడూ ! మీ చక్రవర్తికి తెలియదని నీ కెలా తెలుసు ?

( ఆ మాటలంటూనే కూర్ముడు నాయుడు వంక తేరిపార చూస్తాడు ఆ తరువాత నాయుడుకి నమస్కారం చేస్తాడు )

కూర్మ ---మహారాజా ! మన్నించండి, మీ ముఖంలోని సాముద్రిక లక్షణాలు మీరే తొండమాను చక్రవర్తి అని చెప్పక చెప్తున్నాయి !

నాయుడు (తొండమానుడు )--- విప్రోత్తమా ! మీరు సరిగానే అర్థం చేసుకొన్నారు ! నేనే తొండమానున్ని!! శ్రీనివాసుని చర్య అర్థం కాక , జానపదులు చేసే విమర్శలు భరించ లేక , ఇలా మారు వేషంలో, అంతరార్థం తెలుసుకోవాలనే బయలు దేరాను. ఆ స్వామి అనుగ్రహము వల్ల , మీ దర్శన భాగ్యం కలిగింది. ఆ పైన సందేహ నివృత్తి రెండూ జరిగాయి.

( మహాలక్ష్మి , రాఘవుడు ఇద్దరూ బండి దిగుతారు . మహాలక్ష్మి , తొండమానునికి నమస్కరిస్తుంది )

మహాలక్ష్మి-- మహారాజా ! నన్ను మన్నించండి. తెలియక మిమ్మల్ని అగౌరవ పరచాను.

తొండమాన -- అమ్మా ! ఇందులో మీ తప్పేముంది ? నా మాట మన్నించి , మీరు మీ అబ్బాయితో పాటు మా రాచ నగరులో ఉండండి. భూసురులైన ఈ కూర్మావధాని గారు , కాశీ గంగలో అస్థి నిమజ్జనం చేసి, నిశ్చింతగా తిరిగి వచ్చెవరకు నా ఆథిత్యాన్ని అంగీకరించండి.

మహాలక్ష్మి ---మహారాజా ! మీరు మన్నిస్తానంటే నేనొక మాట చెప్పదలచు కొన్నాను.

తొండమాన -- చెప్పండమ్మా !

మహాలక్ష్మి –నేను నిరుపేద శ్రోత్రియ కుటుంబంలో పుట్టిన దానిని. నాకు మీ రాచ నగరులోని , రాణి వాసపు స్త్రీలతో ఎలా మెలగాలో తెలియదు. దాసీ జనాలని సైతం ఆజ్ఞాపించే అలవాటు లేదు. నేను ఒంటరిగా ఏకాంతంగా ఉండాలనే అభిలాష కల దానిని.

తొండమాన --- అమ్మా ! మీరు ఏకాంత వాసం చెయ్యాలనుకొంటే , చెయ్యవచ్చు. కాని మీరు ఇప్పుడు గర్భం దాల్చి ఉన్నారు ! మీ బాగోగులు చూసే నిమిత్తం పరిచారికలు అవసరం, కాదంటారా ?

మహాలక్ష్మి – ప్రతీ రోజూ , ప్రతీ నిముషమూ వారి అవసరం ఉండదు . నా పనులు నేను చేసుకోగలను, ఎప్పుడైనా అవసరం వస్తే ---

తొండమాన----అలాగేనమ్మా ! మీకు అవసరం కలిగినప్పుడు , మీరొక గంట వాయిస్తే చాలు, పరిచారికలు వచ్చి, వాలే ఏర్పాట్లు చేస్తాను.

మహాలక్ష్మి –- అయినా మహారాజా ! మీరు క్షత్రియులు , మీ ఆహారపు అలవాట్లు ---

తొండమాన -- అమ్మా ! మీకు స్వయం పాకానికి ఏర్పాట్లు చేస్తాను, ఇక కాదనకండి--- కూర్మావధాని గారూ ! ఇదుగో యీ ధనాన్ని స్వీకరించి ,నిశ్చింతగా యాత్ర ముగించి రండి.

( అని తన దుస్తుల్లో నుండి ఒక జోలె తీస్తాడు, దానిని కూర్మావధానికి ఇస్తాడు )

******************