బాలాజీ అర్చావతార విశేష దృశ్యార్చన 31

బాలాజీ అర్చావతార విశేష దృశ్యార్చన 31

( దృశ్యము 107 )

( తొండమాను రాజు రాణీవాసం )

( బ్రాహ్మణ స్త్రీ మహాలక్ష్మి , ఆమె అయిదేళ్ల కొడకు రాఘవ , కొంతమంది పరిచారికలు ఉంటారు )

( మహాలక్ష్మి , ఆ భవనాన్ని, అక్కడున్న వైభవాన్ని, పెద్దపెద్ద కళ్లతో మిర్రి మిర్రి చూస్తుంది. ఆమెకి అంతా కొత్తగా ఉంది. సిగ్గు సంకోచంతో ద్వారం దగ్గరే నిలబడుతుంది. రాఘవ సంగతి సరే సరి ! తల్లి వెనకాల బిక్కు బిక్కుమని చూస్తూ ఉంటాడు )

౧ పరిచారిక-- రండమ్మా, రండి , లోపలికి రండి.

(మహాలక్ష్మి ద్వారం దాటి అడుగు వేయబోతుంది. అక్కడ పరిచి ఉన్న రత్న కంబళం చూసి వెనకడుగు వేస్తుంది. దాని పైన అడుగు పెట్టాలంటే భయం )

౧ పరిచారిక --- ( నవ్వు ఆపుకొంటూ )-- ఆ రత్న కంబళానికేమీ కాదమ్మా , మీరు లోపలికి రండి.

(తక్కిన పరిచారికలు కిసుక్కున నవ్వుతారు. మహాలక్ష్మి ముఖం చిన్నబోతుంది. లోపలికి వస్తుంది, వెనకాలే పిల్లవాడు వస్తాడు )

౧ పరిచారిక ---కూర్చోండమ్మా !

( మహాలక్ష్మి ధైర్యం చేసి ఆసనంపైన కూర్చొంటుంది. అది మెత్తగా క్రిందకి దిగుతుంది. గాభరా పడి లేచి, క్రింద కూర్చొంటుంది. పరిచారిక లందరూ గొల్లున నవ్వుతారు )

౨ పరిచారిక-- ఉత్త పల్లెటూరి బైతులాగ ఉందే ! మన మహారాజు గారికి ఎక్కడ తగిలిందో !

( తక్కిన పరిచారికలు మళ్లీ నవ్వుతారు )

౧ పరిచారిక-- అమ్మా ! ఇది మెత్తటి ఆసనం ! గభాలున కూర్చోకూడదు, నెమ్మదిగా ఇలా కూర్చోవాలి

( అని తను కూర్చొని చూపిస్తుంది ౨ పరిచారిక మహాలక్ష్మిని క్రింద నుండి లేవ దీస్తుంది. అలా లేవ తియడంలో పరచారిక చెయ్యి, మహాలక్ష్మి చక్కిలిగింత పెట్టినట్లయి దూరం జరుగుతుంది. పరిచారిక అది చూసి నవ్వుకొంటుంది.)

౨ పరిచారిక--- ( తనలో ) ఈవిడకి చక్కిలిగింతలు ఎక్కువగా ఉన్నట్లున్నాయి. ఒక ఆట పట్టించాలి.

( అలా అనుకొని , తక్కిన వాళ్ల దగ్గరికి వెళ్లి ఆ విషయం చెవిలో చెప్తుంది )

౧ పరిచారిక--- అమ్మా ! మీరు మా మహారాజుల వారి అతిథులు ! క్రింద కూర్చోకూడదు. ఆసనం మీదనే కూర్చోవాలి. అలా కాకపోతే , మాకు మహారాజు గారి దగ్గర మాట వస్తుంది.

౨ పరిచారిక—అవునమ్మా ! మా ఉద్యోగాలు పోతాయి.

(అంటూ ౨వ పరిచారిక. , తక్కిన వారు మహాలక్ష్మిని బలవంతంగా కూర్చోబెడతారు. ఆ కూర్చోబెట్టడంలో ఆమెకి కిత కితలు పెడతారు. మహాలక్ష్మి శరీరాన్ని కుంచించి ముడుచుకు పోతుంది. ఆమెకి పరిచారికలంటే అసహ్యం పుడుతుంది. )

( తల్లి భంగపాటు చూసి , రాఘవకు కోపం వస్తుంది. పరిచారికలని తన చిట్టి చేతుల్తో కొడతాడు. పరిచారికలు కుర్రాడికి అంతకుండా పరిగెడతూ, చుట్టు చుట్టూ తిరుగుతూ , మహాలక్ష్మికి కితకితలు పెడుతూ ఉంటారు)

(మహాలక్ష్మికి కళ్లనీళ్ల పర్యంతం అవుతుంది. అది చూసిన ౧వ పరిచారిక ముందుగా తేరుకొంటుంది.)

౧వ పరిచారిక—మీరు ఉండండే ! ఆవిడని ఇబ్బంది పెట్టకండి. ( అని తక్కిన పరిచారకలని వారించి, మహాలక్ష్మి దగ్గరకి వెళ్తుంది. ) అమ్మా ! మీరు స్నానం చేసి, మంఛి బట్టలు కట్టుకోండి. అలాగే మీ అబ్బాయి చేత కూడా కట్టించండి. మహారాజుల వారు వచ్చేసరికి, మీరు బాగా ముస్తాబయి కళ కళ లాడుతూ కనిపించాలి, రండమ్మా !

( మహాలక్ష్మి లేని ధైర్యం తెచ్చుకొని, కుర్చీలో నిటారుగా కూర్చొంటుంది. రాఘవ వచ్చి, ఆమె ఒళ్లో కూర్చోబోతాడు. వానిని ప్రక్కనున్న మరో ఆసనం మీద కూర్చోబెడుతుంది )

మహాలక్ష్మి—నాకూ , మా అబ్బాయికీ స్నానాల గది చూపించండి. మీరెవ్వరూ లోపలికి రానక్కర లేదు ! నా పనులు నేను చేసుకోగలను !

౨వ పరిచారిక--- మీ పనులు మీరే చెసుకొంటే ఇక మేమెందుకమ్మా ? మీకు ఒళ్లు రుద్ది, నీళ్లు పొసి, తల ఆరబెట్టి ధూపం వేసి , కొత్త కోక, రైక తొడగాలాయె ! అవన్నీ మీరు చేసుకొలేరమ్మా !

( మహాలక్ష్మి ధైర్యాన్ని కూడగట్టుకొంటుంది ),

మహాలక్ష్మి-- ఇలా ఎకసెక్కాలు చేసి చేసే సపర్యలు నాకు అక్కర లేదు ! నా పనులు నేను ఛెసుకొ గలను ! నేనే చేసుకొంటాను కూడ ! మీకు మహారాజుల దగ్గర మాట రాకుండా ఉండాలంటే , నాకు స్నానాల గది చూపించండి. అంతే కాదు ఒంటరిగా వదిలెయ్యండి

౨వ పరిచారిక--- అమ్మో ! పిట్ట కూత పట్టిందే ! రండే, మన అవసరం లేనప్పుడు మన మెందుకే ఇక్కడ ?

( అని పరిచారికలని వారించి , బయటికి వెళ్తుంది. తక్కిన పరిచారికలు ఆమెను అనుసరిస్తారు ౧వ పరిచారిక మాత్రం ఉండి పోతుంది )

౧వ పరిచారిక—అమ్మా ! మీరు మీ అబ్బాయి నాతో రండి. మీకు స్నానాల గది చూపిస్తాను. అలాగే దుస్తులు, ఆభరణాలు. ఇస్తాను. మీరు కోరినట్లే , మీ పనులు మీరే చేసుకొండి. నేను మీరు పిలుస్తేనే వస్తాను.

( పరిచారిక మహాలక్ష్మిని, రాఘవనీ, చెయ్యి పట్టుకొని లేవ దీస్తుంది. )

******************

( దృశ్యము ౧౦౮ )

( తొండమానుని రాణీవాసం )

(మహాలక్ష్మి , రాఘవ మంచి దుస్తులతో బాగా ముస్తాబయి వస్తారు. పరిచారికలు అందరూ మహాలక్ష్మి వైపే చూస్తూ ఉండిపోతారు )

౨వ పరిచారిక--- ( మెల్లగా ) స్నానం చేసుకొని అలంకరించుకొని వస్తే, ఈవిడ రాణీ వాసపు స్త్రీలాగే ఉందే !!

( ఆ మాటలు మహాలక్ష్మి వింటుంది. ఆమెలో ధైర్యం పెరుగుతుంది. హుందాగా నడిచి వచ్చి ఠీవిగా ఆసనంపై కుర్చొంటుంది.

( అదే సమయానికి మహారాజు వస్తున్నట్లు గంట మ్రోగుతుంది )

(పరిచారిక లందరూ ద్వారానికి రెండు వైపులా బారులు కట్టి నిల్చొంటారు. ప్రవేశం తొండమానుడు )

౧వ పరిచారిక --- స్వాగతం మహారాజా, స్వాగతం !

(మహాలక్ష్మి కూడ లేచి నిలబడుతుంది.)

మహాలక్ష్మి--- మహారాజా వారికి నమస్కారం !

తొండమాన---- నమస్కారమమ్మా ! మీరు కాల కృత్యాలు నెరవేర్చుకొన్నట్లే కదా ?

మహాలక్ష్మి—చిత్తం మహారాజా !

తొండమాన---- ఇక్కడ మీకే ఇబ్బంది లేదు కదా ?

(పరిచారికలు మహారాజు ప్రశ్న విని, మహాలక్ష్మి ఏం చెప్తుందేమోనని , భయంతో ఆమె వంక చూస్తారు. మహాలక్ష్మి వాళ్ల వంక అలవోకగా చూసి నవ్వుతుంది )

మహాలక్ష్మి---లేదు, మహారాజా ! అయినా నేను మీకు ముందే విన్నవించుకొన్నాను. నాకీ రాణి వాసం అలవాట్లు, పరిచారికా వర్గాల సేవలు అవసరం లేదని !

తొండమాన-- అమ్మా ! అయితే మీరు ఏకాంత వాసాన్నే అభిలషిస్తున్నారా ?

మహాలక్ష్మి—అవును మహారాజా !

తొండమాన--- అలాగేనమ్మా ! మీరు కోరినట్లే ఏర్పాట్లు చెస్తాను. ( పరిచారికతో ) నీవు బయటికి వెళ్లి, అంతఃపుర రక్షక సేన దండనాధున్ని పిలు.

( ౧వ పరిచారిక పరుగు పరుగున వెళ్తుది. ఆమె వెనుక దండనాధుడు వస్తాడు )

( దండ నాదుడు రణ సింహుడు వస్తూనే మహారాజకి నమస్కరిస్తాడు )

.రణ సింహ --- మహారాజులకు జయమగు గాక !

తొండమాన--- దండనాదా ! నీ పేరేమటి ?

రణ సంహ--- రణ సింహుడు మహారజా !

తొండమాన--- రణ సింహా ! మన అంతః పురంలో దూరంగా, ప్రశాంతంగా ఉండే విశ్రాంతి గృహం ఏదైనా ఉందా ?

రణ సింహ ---- ఉంది రణ సింహా ! అంతః పుర ఉద్యానవనం వెనుక ఏకాంతంగా ఉంద.

తొండమాన—ఆ విశ్రాంతి భవనం శుభ్రం చేయించు. ఈ బ్రాహ్మణ స్తీ మహాలక్ష్మీ దేవి , ఆమె కుమారునితో పాటు అక్కడ కొంత కాలం నివసిస్తారు. ఆమె నివాసానికి కావలసిన ఏర్పాట్లు అన్నీ స్వయంగా పర్యవేక్షించు, అర్థమయిందా ?

రణసింహ --- అర్థమయింది మహాప్రభూ ! ఏడాదికి సరిపడేలా ఆహార దాన్యాలు, తైల , ఘృత , మధు భాండాలు, దుస్తులు . ఆభరణాలు , ఇక్కిన రాజోపచారాలు అన్నీ భవనం లోనే అమరుస్తాను. మరి పరిచారకలు—

తొండమాన--- ఆగు ! ఈమెకు పరిచారికలు,వారి సపర్యలు, నచ్చవు ! వారి పనులు వారే చేసుకొంటారు ! అయినా పరిచారిక అవసరం తప్పక ఉంటుంది ! కాబట్టి, ఎవరో ఒకరిని పిలుస్తే పలికేలా ఏర్పాట్లు చెయ్యి.

రణసింహ --- అలాగే ప్రభూ ! ముఖ్య ద్వారాలన్నీ మూయించి , తాళాలు వేయిస్తాను. కాపలా భటులను పెట్టి, ఎవరినీ లోపలికి వెళ్లకుండా చేస్తాను. ఆమెకి ఎప్పుడు ఎవరి అవసరం వచ్చినా పిలస్తే పలికేలా ఏర్పాట్లు చేస్తాను.

తొండమాన--- అలాగే చెయ్యి ! ఇంకేవైనా సందేహాలుంటే మంత్రి గారితో సంప్రదించు.—ఇక నువ్వు వెళ్లవచ్చు !

రణసింహ-- ఆఙ్ఞ , మహారాజా ! ( అంటూ వెళ్లి పోతాడు )

తొండమాన-- అమ్మా ! మీరు నిశ్చింతగా ఉండండి. ఏర్పాట్లన్నీ జరిగే లోగా ఇక్కడ కూడ ఏకాంతంగా ఉండ వచ్చు ! ఒల ఒక పరిచారికను ఇక్కడ ఉంచుతాను.

మహాలక్ష్మి--- అలాగే మహారాజా ! మీకు చాల కష్టం ,కలిగించాను !

తొండమాన -- ఇక్కడ కష్ట నష్టాల ప్రసక్తి వద్దు. మీరు మాకు అతిథులు ! మీరు కోరిన విధంగా నాకు ఆతిథ్య మివ్వడం నా కర్తవ్యం ! మీకు ఎప్పుడు ఏ అవసరం వచ్చినా సంకోచించకుండా దండనాధులతో చెప్పండి.

మహాలక్ష్మి---అలాగే మహారాజా !

తొండమాన --- ఇక మీరు విశ్రాంతి తీసుకోండి.నేను వెళ్లి వస్తాను.

**************** .

( దృశ్యము ౧౦౯ )

( తొండమాను మహారాజు అంతః పుర ఉద్యాన వనం చివర, విశ్రాంతి గృహము )

( బ్రాహ్మణ స్త్రీ మహాలక్ష్మి, ఆమె కొడుకు రాఘవుడు దండనాధుడు రణ సింహుడు ఉంటారు )

రణ సింహ-- అమ్మా ! వంట గది, సామాన్ల గది చూసారా ?

మహాలక్ష్మి---చూసాను.

రణసింహ --- ఏడాది వరకు సరిపోయే వంట చెరుకు, ఆహార పదార్ధాలు, తక్కిన సామాగ్రి సిధ్ధం చేసాను. ఇంకా ఏవైనా కావాలంటే చెప్పండీ.

మహాలక్ష్మి---కొన్ని ఆయుర్వేద మూలికలు, పసర్లు, మందులు కావాలి.

రణసింహ--- అలాగేనమ్మా ! మరి కాసేపటిలో మా ఆస్ఠాన వైద్యుల వారిని పంపిస్తాను ! అతను మీకు కావలసిన మందులు వగైరా ఏర్పాటు చేస్తారు.. వైద్యుల వారు వచ్చి వెళ్లిన తరువాత , ముఖ్య ద్వారాలన్నీ, మూయించి, గొలుసులతో బంధించి,తాళాలు వేయిస్తాను. మీకు ఏ అవసరం వచ్చినా ఈ గంట వాయిస్తే చాలు నేను గాని, కాపలా భటులు గాని, మీ అవసరాలు కనుక్కొంటారు.

మహాలక్ష్మి--- మంచిది దండనాధా ! అలాగే కానివ్వండి.

****************








.