బాలాజీ అర్చావతార విశేష దృశ్యార్చన 33

బాలాజీ అర్చావతార విశేష దృశ్యార్చన 33

( దృశ్యము 112 )

( తొండమాను రాజు తోటలోని విశ్రాంతి గృహము, ముఖ్య ద్వారము . గొలుసులతో కట్టబడి, తాళాలతో బిగింప బడి ఉంటుంది )

( లోపల బ్రాహ్మణ పత్ని మహాలక్ష్మి, నిండు చూలాలు, ఆమె కొడుకు రాఘవ ఉంటారు )

( మహాలక్ష్మికి ప్రసవ వేదన మొదలవుతుంది )

మహాలక్ష్మి---- ( బాధతో ) రాఘవా ! నాయనా రాఘవా !

రాఘవ --- ఏంటమ్మా ! ఏమయింది నీకు ? నొప్పిగా ఉందా ?

మహాలక్ష్మి--- అవును నాయనా ! నా కడుపు లోపల నీ చెల్లెలు బయటికి రావాలని తొందర పడుతోందిరా !
రాఘవ –అమ్మా, అమ్మా !

మహాలక్ష్మి---- ఏమిటి నాయనా ?

రాఘవ --- చెల్లి వస్తుందా అమ్మా ?

మహాలక్ష్మి---- అవును నాయనా !

రాఘవ---- ఎలా వస్తుందే ?

మహాలక్ష్మి--- ( బాధతో ) నీ చెల్లి కడుపు చీల్చుకొని బయటికి వచ్చేలాగుందిరా !

రాఘవ---- కడుపు ~~ నీ కడుపు ~~చీల్చుకొని వస్తుందా ? అమ్మా, మరి ~ మరి ~ నీకేమీ కాదా ?

మహాలక్ష్మి ---రాఘవా ! ఓ పని చెయ్యరా !

రాఘవ --- ఏమిటమ్మా ?

మహాలక్ష్మి---ఆ తాడు పట్టుకొని గంట వాయించరా !

రాఘవ --- గంట వాయిస్తే ఏమవుతుందమ్మా ?

మహాలక్ష్మి--- అబ్బ ! ప్రశ్నలతో విసిగించకు ! ముందు ~~~ ముందా గంట వాయించు.

రాఘవ--- తాడు పట్టుకొని లాగితే గంట వాగుతుందా అమ్మా !

మహాలక్ష్మి----అవును.

రాఘవ --- మరి, ఇన్నాళ్లూ చెప్పలేదేం ?

మహాలక్ష్మి---- చెప్తే, అనవసరంగా వాయిస్తావని ~~~ నాయనా ! ఈ బాధ భరించ లేకుండా ఉన్నానురా ! వేగరం ఆ గంట వాయించు.

రాఘవ---- అలాగేనమ్మా !

( రాఘవుడు గంట దగ్గరకు వెళ్తి చూస్తాడు. గంట ఆ మహల్ లో ఎత్తుగా బురుజుల మధ్య ఉంటుంది. దానికి పొడవైన తాడు వేలాడుతోంది. ఆ తాడు కొస ఒక స్తంభానికి చుట్టి ఉంటుంది )

( రాఘవ స్తంభానికి చుట్టిన తాడును విప్పుతాడు. తరువాత ఆ తాడు పట్టుకొని బలంగా లాగుతాడు )

( తాడు ఎలుకలు కొరకడం వల్ల స్తంభం ఎత్తులో తెగిపోయి ముక్కలవుతుంది ! రాఘవ ఆ తాడు పట్టుకొని తల్లి దగ్గరకు వెళ్తాడు)

( మహాలక్ష్మి బాధతో మూలుగుతూ ఉంటుంది )

రాఘవ--- అమ్మా, అమ్మా ! తాడు తెగిపోయిందే !

మహాలక్ష్మి--- ( గాభరాతో ) ఏమన్నావ్ రాఘవా ? తాడు తెగిపోయిందా ? అమ్మబాబోయ్ ! ఇప్పుడెలా ~~ ఉండు, నేను వచ్చి చూస్తాను.

(మహాలక్ష్మి కష్టం మీద లేచి నిల్చొని, అక్కడకు వస్తుంది. తెగిన తాడు కొసను అందుకోవాలని, విఫల ప్రయత్నం చేస్తుంది )

మహాలక్ష్మి---రాఘవా ఈ తాడు అందడం లేదురా, ఇప్పుడెలాగురా ?

(మహాలక్ష్మి చుట్టూ చూస్తుంది. కొంచెం దూరంలో ఒక కర్ర బల్ల కనిపిస్తుంది )

మహాలక్ష్మి--- రాఘవా ! పద, మన మిద్దరం ఆ బల్ల నిలా ఈడుద్దాం ! బల్ల మీద నిలబడి తాడు లాగవచ్చు !

( మహాలక్ష్మి రాఘవ ఎ<తో ప్రయాసతో ఆ బల్లని ఈడ్చి, గంట దగ్గరకు తెస్తారు.తరువాత మహాలక్ష్మి ఎంతో కష్టపడి బల్ల మీదకి ఎక్కుతుంది. తాడు అందుకొని గంట వాయించ బోతుంది, పట్టు జారుతుంది.తిరిగి తాడు కొసని అందుకొంటుంది, బలంగా లాగుతుంది. ఆ తాడు పై భాగం కూడ ఎలుకలు కొట్టి వేయడం వల్ల, తాడు తెగిపోయి , మహాలక్ష్మి బల్ల మీద నుండి తూలి క్రింద పడుతుంది. ఆమె తల స్తంభాఆనికి తగులుతుంది. రక్త పాతం ! ఒకటే రక్తపాతం ! మహాలక్ష్మి గట్టిగా అరచి, ఆ రక్తపు మడుగులో చివరి శ్వాస విడుస్తుంది )

( రాఘవ క్రింద పడ్డ తల్లిని చూస్తాడు . ఆమె దగ్గరకు వెళ్తాడు )

రాఘవ ---అమ్మా ! దెబ్బ తగిలిందా అమ్మా ? అయ్యబాబోయ్ ! రక్తం కూడ కారుతోందే ! ~~ కట్టు కట్టి మందు వెయ్యాలి, ఎలా ? ముందీ గంట వాయించాలి ! గంట వాయిస్తే మనుషులు వస్తారని అమ్మ చెప్పింది. ( గంట కేసి చూస్తాడు ) ఇఅక ఈ గంట ఎలాగూ వాగదు ! ఆ ! పూజ గదిలో గంట తెచ్చి వాయిస్తాను. అదయితే చక్కగా వాయించ వచ్చు !!

( రాఘవ పూజ గదికి వెళ్లి, ఒక గంట తెస్తాడు. దాన్ని గట్టిగా వాయిస్తాడు. తలుపులు తెరచుకోవు ! ఎవరూ రారు ! రాఘవ తలుపులు బాదుతాడు. వాని చేతుల లోంచి కూడా రక్తం కారుతుంది )

రాఘవ --- అమ్మా ! అమ్మా ! నాకు కూడా దెబ్బ తగిలిందమ్మా ! ఇక చెల్లి వద్దమ్మా ! నువ్వు లేవమ్మా !!

( అంటూనే మూర్ఛపోతాడు )

********************

( దృశ్యము ౧౧౩ )

( తొండమాను రాజు భవనంలో గది )

( తొండమానుడు, రణసింహుడు ఉంటారు )

తొండమాన---- చూసావా రణసింహా ! ఆ మాతా శిశువులు పడ్డ మరణ యాతన !

రణసింహ---- మహాప్రభూ ! మీరు వర్ణించి చెప్తూంటే ఆ దృశ్యం నా కళ్ల ముందు మెదలింది.

తొండమాన --- చూసావా, నేను పాపిని ! ఘోరాతిఘోరమైన పాపం చేసాను !! అంతే కాదు, వాళ్లు క్షేమంగానే ఉన్నారని, ఆమెకు స్త్రీ శిశువు జన్మించిందని ఆ విప్రోత్తమునితో అబధ్ధం కూడ చెప్పాను !! ఇప్పుడు నా కేమి గతి ?! ఏది నిష్కృతి ?! ఎవరిని ఆశ్రయించవలెను ??

( తొండమానుడు ఆలోచిస్తాడు )

తొండమాన---- అవును, ఆపద మొక్కుల వాడయిన ఆ ఏడుకొండల వాడే గతి ! అతడే నిష్కృతి !! అతనినే ఆశ్రయించెదను . ఈ సమస్యకు ఒక దారి చూపించు వరకు శ్రీనివాసుని చరణాలు వదలను !! శ్రీనివాసుడే శరణాగతి నియ్యనిచో నా కిక మరణమే గతి !!!

రణసింహ--- మహాప్రభూ ! మీరు ఒంటరిగా వెళ్ళ వద్దు , మీతో నేను కూడ వచ్చెదను. జరిగిన మహా పాతకములో నాకు కూడ భాగమున్నది కదా ! ప్రభూ ! నేనును ఆ శ్రీనివాసుని శరణాగతి పొందుతాను !

తొండమాన --- సరి ! తక్షణం రెండు గుర్రాలని సిధ్ధం చెయ్యి ! వీలయినంత త్వరగా వేంకటాచలము చేరవలె !

రణసింహ --- మహాప్రభూ ! అటులనే చేసెదను.

***************