నీల గ్రహ నిదానము 3

నీల గ్రహ నిదానము 3

(రెండవ దృశ్యము.)

( దక్ష వాటిక )

( దక్షుడు ఒంటరిగా ఒక శిలా ఫలకం మీద కూర్చొని ఉంటాడు.)

దక్షుఢు --- “ ఓం నమో నారాయణాయ ! ఓం నమో నారాయణాయ !! ఓం నమో నారాయణాయ !!! ” (అని జపిస్తూ ఉంటాడు )

( తెర లోంచి కూడా “ ఓం నమో నారాయణాయ “ అని వినిపిస్తుంది.)

( దక్షుడా ప్రతి ధ్వని విని, నామ జపాన్ని ఆపి చూస్తాడు )

( ప్రవేశం--- నారదుడు, నారాయణ మంత్రం పఠిస్తూ )

నారదుడు --- దక్ష ప్రజాపతీ ! బ్రహ్మ మానస పుత్రుడైన ఈ నారదుడు, ఉపబ్రహ్మవు, పితృ తుల్యులైన మీకు నమస్కరిస్తున్నాడు.

దక్షుడు --- దీర్ఘాయురస్తు ! నారదా ! ఎచటి నుండి నీ రాక ?

నారదుఢు ---- బాబాయి ! నా రాక మాటకేం గాని, మీ పోకడలు మాత్రం విచిత్రంగా ఉన్నాయి. ఇలా ఒంటరిగా ఆరు బయట కూర్చొని, నారాయణ స్మరణ చేయాల్సిన అవసరం మీ కేమొచ్చింది ?

దక్షుడు --- సంసార జంజాటం లేని బ్రహ్మచారివి. సంతానం తెచ్చి పెట్టే సమస్యలు నీ కేమి అర్థమవుతాయి.

నారదుడు --- మీ సంతానం నాకు సోదర తుల్యులు కారా బాబాయి ! అయినా నారాయణ స్మరణతో సమస్యా పరిష్కారం అయిపోతే, ఏడేడు లోకాల జీవుల సమస్యలన్నీ భూతాకారం దాల్చి , అతనిని చుట్టుముట్టి ఉండేవి. అందుకే అతనొక యుక్తి పన్నాడు తెలుసా ?

దక్షుడు --- ఏమిటది నారదా !?

నారదుడు --- సమస్యలు , కోరికలు, సర్వమూ త్యజించి తనని ధ్యానించిన వారికే ముక్తి నిస్తానన్నాడు.

దక్షుడు ---- అన్నిటినీ త్యజించిన వాడు, తనకి తానే జీవన్ముక్తుడవుతాడు. ఇక నారాయణుడు చేసేదేముంది ?

నారదుడు ---- అదే బాబాయి బ్రహ్మ రహస్యం !! ఉపబ్రహ్మవైన నీకు మాత్రం తెలియదా ఏమి ?

దక్షుడు ---- అయితే నారదా ! సమస్యా పరిష్కారానికి నారాయణ నామ స్మరణ అవసరం లేదంటావు.

నారాయణ --- హరి హరీ ! నేనలా ఎప్పుడన్నాను ? అన్నిటికీ నారాయణ స్మరణ అవసరం లేదన్నాను.

దక్షుడు --- నారదా ! నువ్వు మాటలతో చిక్కుముళ్లు వేస్తున్నావు. ఒక దానికొకటి పొందు కుదరడం లేదు.

నారదుడు --- స్టితి కారకుడైన నారాయణుడు, జగద్రక్షణ కొరకు తన లీలా విలాసంతో మూడు కోట్ల దేవతా సమూహాన్ని సృష్టించి వారివారి అర్హతల మేరకు శక్తి సామర్థ్యాలను ఇచ్చాడు. చిన్న చిన్న సమస్యలు చిల్లర దేవుళ్లతోనే తీరిపోయేటప్పుడు నారాయణుని బాధ పెట్టడం ఎందుకు ? ఇంతకీ మీ సమస్య ఏమిటి బాబాయి ? నాతో చెప్పకూడనిదా ?

దక్షుడు --- లేదు నారదా ! నీతో చెప్పుకోవలసినదే !

నారదుడు --- అయితే సావధాన చిత్తుడనై వింటాను.

దక్షుఢు --- నారదా ! నాకు నక్షత్ర యోనిలో జన్మించిన కుమార్తెలలో రోహిణిని దక్క, తక్కిన వారి నందరినీ చంద్రుడు పరిత్యజించాడు.

నారదుఢు ---- ` జామాతా దశమ గ్రహః ' అన్నది ఆర్యోక్తి ! నీ జామాత నవగ్రహాలలోనే ఒకడు కావడం నీ దురదృష్టం !!

దక్షుడు ---నిజమే నారదా! వారి కాపురం నిలబెట్టడానికి నా శాయ శక్తులా,రోహిణీ- చంద్రులకు నచ్చ జెప్పాను.

నారదుడు --- రూప యవ్వన మద గర్వంతో వారు మీ మాటలను పట్టించుకోలేదు, అంతేనా ?

దక్షుడు --- అక్కడితో తీరిపోలేదు నారదా ! నేను ఆవేశంలో రోహిణిపై చేయి చేసుకొన్నాను.

నారదుడు --- అందుకు చంద్రుడు అలిగి మిమ్ములను అవమానించాడు---

దక్షుడు ---- నారదా ! నీకీ విషయం ముందే తెలుసన్న మాట !

నారదుడు --- ఎందుకు తెలియదు బాబాయ్ ! ఆకాశ లోకం కోడై కూస్తూంటే ! మీ శాప ప్రభావం చేత మృత ప్రాయుడైన చంద్రున్ని , శివుడు ఆదుకొన్నాడు. చంద్రుని కళాకాంతులు దినదిన వృద్ధిక్షయములు కాగలవని మీ శాపాన్ని మలుపు తిప్పాడు.----అయినా ‘ కడుపు చించుకొంటే కాళ్ల మీద పడుతుందన్నట్లు’ , మీరు చేసిన పని ఏం బాగుంది బాబాయ్ ! కూతుర్ని ఏలుకోలేదని అల్లుని జవ సత్వాల్ని హరిస్తే నష్ట పోయేది ఎవరు ?

దక్షుడు --- నిజమే నారదా ! ఆ విషయంగానే ఇంట్లో గృహకలహం జరిగింది. భార్యా బిడ్డలందరూ నా పైన అలిగి గృహత్యాగం చేసారు.

నారదుడు --- ఎక్కడికి వెళ్లారు బాబాయ్ ! శివ సన్నిధికేనా ?

దక్షుడు ------ అవును.

నారదుడు --- పిన్ని ఈ విషయంలో పొరపాటు చేసింది బాబాయ్ ! రోహిణీ చంద్రులు శివ ప్రీతి పాత్రులు. అతడిందులో జోక్యం చేసుకొంటాడని అనుకోను. అంతే కాదు బాబాయి, జరిగిన దంతా సపత్నుల మాత్సర్యం వల్లనే జరిగిందని, రోహిణి చంద్రున్ని మరీ కట్టుదిట్టం చేసేసింది ! చంద్రుడామె నక్షత్ర మండలాన్ని తన వెనువెంటనే తిప్పుకొంటున్నాడు. ఇది వరకటి సంగతేమే గాని ఇప్పుడు మాత్రం అతడు ‘ చుక్కల్ని’ పూర్తిగా పరిత్యజించాడు.

దక్షుడు ---- నారదా ! ( నారదును చేతుల్ని పట్టుకొని ) ఆ చిక్కుల పాలైన చుక్కలు నీకు పరాయి వారు కారు. వారిని పతి దరి చేర్చే మార్గాన్ని చూపించు.

నారదుడు ---- చాల కష్టమైన భాద్యతని నెత్తిన పెట్టావు. అయినా ఆలోచించి చూద్దాం.

( నారదుడు మహతీ ఝంకారం చేస్తూ పచార్లు చేస్తాఢు. దక్షుడు వెను వెనుకనే తిరుగుతూ ఉంటాడు )

( అదే సమయానికి రంగ స్థలం పైన లైట్లు ఆరిపోతాయి. వెనుక నున్న నీలి రంగు తెరపై గెలాక్సీ ప్రొజెక్టు చేయబడుతుంది. అంటే నక్షత్ర కాంతల ఆగమనాన్ని సింబాలిక్ గా చూపించాలి అన్న మాట )

( గెలాక్సీ తెర మీద తిరుగుతూ ఉండగా )

నక్షత్రాలు --- ( తెరలోంచి ) నారద మునీంద్రా !! శరణు శరణు !! శివానుగ్రహానికి కూడ నోచుకోని మీ చెల్లెల్లని మీరే ఆదుకోవాలి.

దక్షుడు --- ఏమి యీ వైపరీత్యము ! శివుడు కూడ మీపై జాలి దలుపలేదా ? ( అంటూ ఆసనంపై కూలబడతాడు )

నక్షత్రాలు ---- లేదు తండ్రీ ! రోహిణి, శివుని ముద్దుల మరదలట ! మేము శివ సన్నిధికి వెళ్తున్నామని తెలిసి,అది ముందే అక్కడికి చేరుకొని, ‘ సతీ శివుల’ ఎదుట మా మాటకు చోటు లేకుండా చేసింది.

నారదుడు ---- హరిహరీ ! రోహిణి ఎంతకు తెగించింది.

నక్షత్రాలు --- నారద మహర్షీ !! చక్కని చుక్కలమైన మా వైపు నాథుడు చూడనైన నిచ్చగింప కున్నాడు. మా రోదనం ఆకాశ రోదనమయింది. అన్నవైన నీ వైన మమ్ములను కరుణించు.మార్గాంతరం చూపెట్టు. ( పద్యం )

గీ ఒక్క మారైన మముఁ జూడ నొప్పుకొనడు
చిక్కినాడు రోహిణికదె రిక్క రేడు
మమ్ము కరుణించి నారద మార్గమొండు
చూపుమా యన్న మా గోడు మాపు వేగ!

నారదుడు --- తారామణులారా ! రోహిణీ చంద్రులను విఢదీసినట్లయితే, మీరు మీ నాథున్ని మీ వైపు తిప్పుకోగలరా ?

నక్షత్రాలు --- రోహిణి నాథుని చెంత లేనప్పుడు అంతయు మా కనుకూలమే మునీంద్రా !

నారదుడు --- సరియే తారామణులారా ! మీరు మీమీ నెలవులకు పొండు. అనుకూలమైన మార్గము స్ఫురించినప్పుడు తెలియ జేసెదను లెండు.

నక్షత్రాలు ---- అనుగ్రహించంఢి నారద మహర్షీ !! మీ రాకకై ఎదురు చూస్తూ ఉంటాము.

( గెలాక్సీ ఆఫ్ అవుతుంది, తిరిగి రంగ స్థలం పైన లైట్లు. )

( నారద మహర్షి తిరిగి మునపటిలాగే మహతీ ఝంకారం చేస్తూ తిరుగుతూ ఆలోచిస్తూ ఉంటాడు )

దక్షుడు --- నారదా ! శివుడు రోహిణి పక్షమయినప్పుడు తక్కిన చుక్కల రక్షణ వహించువాడు----

నారదుడు --- శివుని కన్న అధికుడు గాని, అతనితో సమానుడు గాని కావలె !

దక్షుడు --- అందుకే నేను నారాయణ నామస్మరణ చేయ సమకట్టాను.

నారదుడు --- నారాయణుడు చంద్రునికి బావ కాదా బాబాయ్ !

దక్షుడు --- నిజమే నారదా ! నాకు స్ఫురించనే లేదా విషయము ! అయిన నిపుడు మార్గాంతరము ?

నారదుడు ---- రోహిణీ చంద్రుల వియోగము !

దక్షుడు ---- అదెట్లు సాధ్యము నారదా ! ఎవరు చేయ గలరా పనిని ?

నారదుడు ---- బాబాయ్ ! రోహిణీ చంద్రుల వలెనే ‘సతీ శివుల’జంట కూడ విడదీయరానిదే కదా ? వారి దాంపత్యము పరస్పర అనురాగ పూరితము, ఆదర్శవంతము అవునా ?

దక్షుడు ---- అవును.

నారదుడు --- అటువంటి జంటను ఏడున్నర సంవత్సరముల పాటు, వియోగ బాధకు గురి చేసినదెవరో తెలుసా ?

దక్షుడు --- సతీ శివులకు వియోగమా ? అదెప్పుడు సంభవించెను నారదా ? ఎవరా పని చేసిన ప్రతిభావంతులు ?

నారదుడు --- దేవ,దానవ, యక్ష, కిన్నెర, కింపురుష , మానవ, తిర్యగ్ వర్గుల యందు ఏ జీవినైనను ఏడున్నర సంవత్సరముల పాటు, ఇక్కట్ల పాలు చేయగల వారెవరున్నారు ప్రజాపతీ !? అతడు ఛాయా సూర్యుల పుత్రుడు—

దక్షుడు --- యముడా ?

నారదుడు --- కాదు, యమాగ్రజుడైన ‘శనీశ్వరుడు’అతడొక పరి శివుడు వద్దకు వెడలి, “ సదాశివా! నీ వంతు ఏలిన నాటి శని పీఢ ప్రారంభము కానున్నది, ఏమి చేయమందువు ?’’ అని ప్రశ్నించాడట !

దక్షుడు --- శివుడు ఏమన్నాడు ?

నారదుడు --- నీవు నన్నేమి చేయగలవని పంతగించి సతితో కలిసి, ఆలోచించి, సూక్ష్మాతి సూక్ష్మ మైన కారణ శరీరముతో , ‘హిమవంతుని’నడిబొడ్ఢున నున్న చిన్న ఛిధ్రములో ఏడున్నర ఏళ్ల పాటు సమాధి గ్రస్తుడైనాడట !

దక్షుడు --- ఆ పిమ్మట ?

నారదుడు ---- ఏమున్నది ! తరువాత శనిని పిలిపించి నన్నేమి చేయగలిగితివని ప్రశ్నించినాడట ?

దక్షుడు --- అర్థమయినది నారదా ! సతీ శివుల వియోగమే వారి పాలిట శనిపీడ అయినది. శనైశ్వరుడు ఆ విషయమే శివునకు చెప్పెను కాబోలు !

నారదుడు --- అవును బాబాయ్ ! శివునికి సతీ వియోగము చేసిన వాడు, రోహిణికి పతీ వియోగము కల్పింప లేడంటావా ?

దక్షుడు --- భళిరే నారదా ! బహు చక్కని ఆలోచన ! శని ఏడేడు పద్నాలుగు లోకములందు ఎవరి చేతనైనను అపరాజితుడు ! సర్వులను నొప్పింపు వాడే గాని, శర్వునిచే నైనను నొప్పింప బడని వాడు.

నారదుడు -- అతడంత ప్రతిభావంతుడు ఎట్లయినాడు బాబాయ్ ?

దక్షుడు ---- అది పరమేష్థి అతని కిచ్చిన వరము ! జీవులను ఐహిక బాధలకు గురిచేసి, వారి అహంకార చిత్త వృత్తిని నశింపజేసి, ఆముష్మిక పథము వైపు నడిపించుటయే శని కర్తవ్యము ! శని బాధ పడ లేక, అతనిని నిందించు వారి బలము శనినే చేరుట వలన, అతడు క్షణక్షణ ప్రవర్థమానమైన అశేష బలవంతుడు ! నారదా ! శనిదేవుడు ఇప్పుడు కృత్తికాంతమునందు కదా సంచరించు చున్నాడు. !!

నారదుడు --- అవును బాబాయ్ ! రోహిణి కక్ష్యలో ప్రవేశించుటకు ఎంతో సమయము లేదు.

దక్షుడు --- సత్వరముగా, రోహిణీ శకట భేదనము చేయుమని అతనిని వేడుకొనేదను గాక ! నారదా ! నీవు చేసిన సహాయము వెల కట్ట లేనిది ! ఇక సెలవా మరి !! ( వెళ్లి పోతాడు )