రెండున్నర నెలల విరామం తరువాత---

రెండున్నర నెలల విరామం తరువాత---

నవంబరు ౫ తరువాత ‘ క్షీర గంగలో ’ టపా పెట్టడం జరుగ లేదు ! దానికి కారణం నా చిన్న కూతురి యొక్క , చాలా విలువైన ‘గర్భధారణ, ప్రసవం !’ చాలా విలువైన గర్భధారణ అని ఎందుకంటున్నానంటే, అది సహజమైనది కాదు, పరీక్ష నాళిక ద్వారా జరిగిన గర్భధారణ !

నా చిన్న కూతురి పేరు ‘ఇ౦ద్రాణి’, ప్లస్ టూ తరువాత, ఎలక్ట్రికల్, ఎలక్ట్రానిక్ రంగాలలో పోలిటెక్నిక్ డిప్లొమో చేసింది. ఆ విద్యార్హత ఉన్న కారణంగా, రైల్వేలో అతి చిన్న క్లాసు ఫోరు ఉద్యోగిగా ప్రవేశించింది. ఆ తరువాత అంచెలంచెలుగా పదోన్నతి పొందుతూ , డిపార్టుమెంటు పరీక్షలో అసాధారణ ప్రతిభ కనబరిచి, జూనియర్ ఇంజనీయరుగా పదోన్నతి పొందింది. రైల్వే శాఖలో పదేళ్లలో అతి చిన్న స్థాయినుండి, సూపర్వైజరు స్థాయికి ఎదగడం అబ్బురమే మరి !

ఈ లోగా ప్రభుత్వ ఉద్యోగం లభించడం వల్ల , ఆమె వివాహం జరిగింది. ఆమె భర్త శ్రీ జోగారావు రైల్వేలోనే ‘గార్డుగా’ పని చేస్తున్నారు.అతనిది పశ్చిమ రైల్వేలో పని ,అమ్మాయిది దక్షిణ మధ్య రైల్వేలో పని, ఇద్దరూ ఉద్యోగ రీత్యా చెరొక దిక్కులోనూ ఉండేవారు ! చివరికి ఎంతో ప్రయత్నము, నిరీక్షణ తరువాత పదేళ్లకి అతనికి బదిలీ మంజూరు అయి, ఆమె ఉన్న చోటికి రావడం జరిగింది.

ఈ మధ్య కాలంలో ఇంద్రాణికి రెండు సార్లు గర్భస్రావం జరిగింది ! దానికి కారణం మధుమేహం, థెరాయిడ్ సమస్యలేనని చెప్పారు. వాటికి చికిత్స జరిగినా తిరిగి గర్భధారణ కలుగ లేదు. చివరికి సాహసంతో ఇంద్రాణి ఐ.వి.ఫ్, చేయించుకో వడానికి తీర్మానించింది. లక్షన్నర ఖర్చు పెట్టి, స్థానిక ఫెర్టిలిటీ సెంటరులో చేరింది.
ఆమె మొదటి ప్రయత్నం ఫలించ లేదు. పదిహేను రోజుల తరువాత జరిగిన రక్త పరీక్షలో ఆమె ప్రెగ్నెన్సీ కన్ఫర్ము కాలేదు. ఆమె నిరాశ పడక రెండవ సారి ప్రయత్నం చేసి విజయం సాధించింది !

అయితే. గడ్డుకాలం ఇంకా గట్టెక లేదు, మడవ నెలలో స్కేనింగు చేసినప్పుడు , ఆమె గర్భంలో కవలలు పడ్డారనీ, అందులో ఒక పిండం ఎనిమిది వారాల తరువాత, చనిపోయిందనీ తేలింది. ! ఇంద్రాణి బాగున్న పిండానికి జన్మ నివ్వడానికి, అది ప్రాణాపాఉఅం కాగలదని తెలిసినా నిశ్చయించింది.దానికి కారణం ఆ కాలనీలో గృహిణుల అసూయ, గొడ్రాలనే ముద్ర వేసి ఎత్తిపొడుపులంటే అబధ్ధం కాదు. అయిదవ నెలలో ఆమెకి రక్తస్రావం జరిగింది. బిడ్డకి, తల్లికి అనుసంధానమైన నాభి నాళిక తల్లి మూలంలో కన్నం పడి, ప్రక్కకి జరిగి పోయిందని తెలిసింది.అయినా ఇంద్రాణి బిడ్డకే ప్రాధాన్యం ఇచ్చింది ! రక్త స్రావాన్ని ఆపారు, ఆ తరువాత ఇంద్రాణి నమ్మిన దైవం శిరిడీ సాయి ఆమెని కాపాడాడు, నాభి నాళిక చిత్రంగా అతుకుకొంది.

ఆమెని పురిటికి తీసుకొని రావాలని వెళ్లిన మేము డాక్టరు పర్మిషన్ ఇవ్వక పోవడం వల్ల, అక్కడే ఉండి పోయాము. చివరికి ఎంతగానో ఎదురు చూసిన ప్రసవం అయింది. బిడ్డని బయటికి తీసిన తరువాత, ఆ శిశువుని ఇన్క్యుబులేటర్లో ఉంచాల్సి వచ్చింది ! శిశువుకి మధుమేహం, పచ్చ కామెర్లు వచ్చే అవకాశల నుండి రక్షణ కోసమని, ఆ విధంగా ఇంద్రాణి తన బిడ్డని ప్రసవించగానే చూసుకోలేక పోయింది ! మరో పది రోజుల నిరీక్షణ తరువాత తల్లీ పిల్లలు కలిసారు.

ఆ తరువాత ఇరవై ఒకటి రోజులకి , మేము తల్లీ పిల్లలతో సహా మా ఇంటికి వచ్చాము. అదండీ, క్షీరగంగ నిల్చి పోవడానికి కారణం .