అళియ అరాళీయము -- ౬

దృశ్యం ౬

( గోల్కొండ కోట లోని రాచబాట)

( తెల్లని తెర మీద  పురవీధిని ప్రదర్శించాలి)

( రామరాజు ఉదాశీనంగా అడుగులు వేస్తూ ఉంటాడు. నలుగురు సిపాయిలు చేత ఆయిధాలతో అతని వెనకగా వస్తారు. అతని మీద నల్లని ముసుగు వేసి కప్పి, అతనిని క్రింద పడవేసి, గుండేల పైన బల్లేలు గురి పెడతారు వారిలో ఇద్దరు)

( తక్కిన ఇద్దరు ఒక తాడుతో ఆ ముసుగుతోనే అతనిని బంధించి ఈడ్చుకొంటూ వెళ్తారు)

( లైట్లు ఆరిపోతాయి)

దృశ్యం ౭

( రహీంఖాన్ ఇంట్లోని చెరసాల)

( తెల్ల తెర పైన చెరసాలని చూపించాలి)

(రామరాజు బందీగా ఉంటాడు. అతని కాళ్లు, చేతులు కట్టేసి ఉంటాయి. నోట గుడ్డ కుక్కబడి ఉంటుంది. కళ్లకి గంతలు కట్టి ఉంటాయి)

(ప్రవేశం ఇద్దరు కొజ్జాలు)

౧.కొజ్జా
    అక్కాయా ! కాపలా దారులు ఇద్దరూ మంచి  పోటుగాళ్లలా ఉన్నారు. నాకైతే మనసయి పోయిందనుకో !

౨..కొజ్జా
    మనసు పారేసుకోకే చెల్లాయా ! పని మీద వచ్చి  ఇలాంటి వాటికి పడిపోతే , ఫలితం దక్కదే ‘బేవార్సు పింజా ’!

౧.కొజ్జా
    బేవార్సు పింజ అంటే ఏంటే అక్కాయా ?

౨.కొజ్జా
    కరుకు కాయ కాదు, పండు కాయా కాదు, ఏ మాత్రం ఎదగని ముదర పింజనే,‘ బేవార్సు పింజ’ అంటారే
 చెల్లాయా !

౧.కొజ్జా
    అక్కాయా ! నేను అన్నానని అనుకోకు, నువ్వూ, నేనూ , ‘బేవార్సు పింజలమే’ కదా అక్కాయా ?

౨.కొజ్జా
    ఛీ పో ! పళ్లు రాలగొడతాను. ఖైదీని విడిపించు ముందు .

(ఇద్దరూ రామరాజు దగ్గరకి వెళ్లి , అతని కట్లు విప్పుతారు. కళ్లకి ఉన్న గంతలు, నోట్లో కుక్కిన్ గుడ్డ తీస్తారు)

రామరాజు:
    ఎవరు మీరు?

౧. కొజ్జా
    తెలియడం లేదా పోటుగాడా ! మేము ` బేవార్సు పింజలం'

రామరాజు:
    అంటే?

౨.కొజ్జా
    దాని మాటలకేం గాని అందగాడా , రహీంఖాన్ బంధించి ఉంచిన నిన్ను విడిపించడానికి వచ్చాం. కాపలా కాసే  సిపాయిఅలకి మా హొయలు. వగలు చూపించి, మత్తు మందు ఇచ్చి వచ్చాం.

రామరాజు:
    అలాగా ! కృతఙ్ఞుణ్ని, నన్ను విడిపించడానికి ఇంత ప్రయత్నం చేసిన మీరెవ్వరు ?

౨.కొజ్జా
    మా మలికిన్ ‘కుల్’సుంబీ’ బేగం హుకుం మీద వచ్చాం.

౧.కొజ్జా
    పోటుగాడా ! నువ్వు ఆవిడా మనసు గెలుచుకొన్నావ్ !నిన్ను ‘ నికా’ చేసుకొంటుందట !

రామరాజు:
    ఎవరు, ‘కుల్’సుంబీ’వా, ఆవిడ ఎవరు ?

౨.కొజ్జా
    ఇతరు, అత్తరు, అగరొత్తులు, చందనాలు అమ్మే వ్యాపారి మా మాలికిన్ ! నిన్ను తప్పించి తెస్తే బోలెడి డబ్బులిస్తానంది !

౧.కొజ్జా
    కాని నిన్ను చూస్తుంటే ( అతని చెయ్యి పట్టుకుంటూ) తప్పించాలని లేదు పోటుగాడా ! నిన్ను వాటేసుకొని పోట్లాడాలని ఉంది !

౨.కొజ్జా
    అదుగో చెల్లాయా ! మళ్లీ పని మరిచిపోయి మనసు మాటలాడుతున్నావ్ ! ముందు అతనిని తీసుకొని పదవే బేవార్సు పింజా !.

౧.కొజ్జా
    అలాగే  అక్కాయా ! ( రామరాజు చెయ్యి పట్టుకొంటుంది )

౨.కొజ్జా
    నీ చేతికి కత్తినిస్తే వందమందినైనా ఎదిరించ గలవని చెప్పింది మా మాలికిన్ బీబీ ! కాని మా దగ్గర కత్తి లేదు.

౧.కొజ్జా
    ( అక్కడ ఉన్న ఒక లాఠీని  తీసి ) ఇదుగో ఈ లాఠీని తీసుకొని రా, ఎవరైనా ఎదిరిస్తే బుర్రలు బద్దలు కొట్టేయి, అంతే కదా అక్కాయా ?

౨. కొజ్జా
    అంతే పోటుగాడా ! బుర్రల మీదే కొట్టు.

౧.కొజ్జా
    తొడల మీద కొట్టమాకు అందమైన పోటుగాడా ! మా లాంటి బతుకులు  అయిపోతాయి.

౨.కొజ్జా
    అంటే  బేవార్సు పింజలు అయిపోతారు పద అందగాడా , మాతో రా !

( ఇద్దరూ రామరాజు చేతులు పట్టుకొని బయటికి తీసుకెళ్తారు)

( లైట్లు ఆరుతాయి )